ഒരു കൊവിഡ് രോഗി പോലുമില്ലാത്ത ലോകത്തെ 10 രാജ്യങ്ങൾ അറിയേണ്ടേ?
Want to know 10 countries in the world that don't even have a Covid patient?
വാഷിങ്‌ടൺ: ലോകം മുഴുവൻ പ്രതിരോധ പ്രവർത്തനങ്ങളുമായി മുന്നോട്ട് നീങ്ങുകയാണ്. കൊറോണ വൈറസിനെ പ്രതിരോധിക്കാൻ വാക്‌സിൻ കണ്ടെത്താനുള്ള ശ്രമങ്ങൾ ഇന്ത്യയടക്കമുള്ള രാജ്യങ്ങൾ ആരംഭിച്ചു കഴിഞ്ഞു. അമേരിക്ക, ബ്രസീൽ, ഇന്ത്യ എന്നീ രാജ്യങ്ങളാണ് കൊവിഡ് കേസുകളിൽ ആദ്യമുള്ളത്. നിലവിലെ കൊവിഡ് കേസുകളുടെ തോത് പരിശോധിച്ചാൽ ഇന്ത്യ ബ്രസീലിനെ മറികടക്കുമെന്ന കാര്യത്തിൽ സംശയമില്ല.
180ലധികം രാജ്യങ്ങൾ കൊവിഡിനെതിരെ പ്രതിരോധം തീർക്കുമ്പോൾ ലോകത്ത് ഒരു കൊവിഡ് രോഗി പോലുമില്ലാത്ത പത്ത് രാജ്യങ്ങളുണ്ട്. പസഫിക് ഐലൻഡിലെ രാജ്യങ്ങളിലാണ് കൊവിഡ് കേസുകൾ റിപ്പോർട്ട് ചെയ്യാത്തതെന്നാണ് ബിബിസി റിപ്പോർട്ട് ചെയ്യുന്നത്. പലാവു, മൈക്രോനേഷ്യ, മാർഷൽ ഐലൻഡ്‌സ്‌സ്, നൗറു, കിരിബാതി, സോളമൻ ഐലൻഡ്‌സ്, തുവാലു, സമോവ, വനോട്ടു, ടോംഗ എന്നീ പത്ത് രാജ്യങ്ങളിലാണ് ഒരു കൊവിഡ് കേസുകൾ പോലുമില്ലാത്തത്.
ഐക്യരാഷ്‌ട്ര സഭയിൽ അംഗങ്ങളായ മുഴുവൻ രാജ്യങ്ങളെയും പരിഗണിച്ചാണ് അധികൃതർ ഈ പട്ടിക തയ്യാറാക്കിയത്. ഈ രാജ്യങ്ങളിൽ പലതും ടൂറിസം വരുമാനമാക്കിയവരാണ്. കൊവിഡ് പ്രതിസന്ധിയിൽ വിമാന സർവീസുകൾ നിലച്ചതോടെ ഈ രാജ്യങ്ങൾ കടുത്ത സാമ്പത്തിക പ്രതിസന്ധി നേരിടുകയാണ്. കൂടാതെ ജനസംഖ്യയും കുറവാണ്.
പാലാവുവിൽ 18000 ആണ് ജനസംഖ്യ. ടൂറിസം വരുമാനമാക്കിയ രാജ്യത്ത് കഴിഞ്ഞ വർഷം മാത്രം ഒരു ലക്ഷത്തിലധികം പേരാണ് എത്തിയത്. കൊവിഡ് ഭീഷണി ലോകം മുഴുവൻ വ്യാപിച്ചതോടെ ടൂറിസം മേഖലയിൽ നിയന്ത്രണമുണ്ടായി. ഹോട്ടലുകളും ലോഡ്‌ജുകളും അടച്ചിട്ടു. ഇതോടെ ടൂറിസത്തിൽ നിന്നുള്ള വരുമാനവും ഇല്ലാതായി. രാജ്യത്ത് 50 ശതമാനത്തോളം ടൂറിസം മേഖലകളാണെന്നാണ് അധികൃതർ വ്യക്തമാക്കുന്നത്.
പട്ടികയിലെ മറ്റ് രാജ്യങ്ങളും ടൂറിസം വരുമാനമാക്കിയവരാണ്. അതിനാൽ തന്നെ കടുത്ത നിയന്ത്രണങ്ങൾ ഈ രാജ്യങ്ങളും സ്വീകരിച്ചു. ഇതോടെ കൊവിഡിനെ പ്രതിരോധിക്കാൻ ഇവർക്കായി. ഇതിനിടെ ഹോങ്കോങിൽ കൊവിഡ് രോഗമുക്തി നേടിയ യുവാവിന് മാസങ്ങള്‍ക്ക് ശേഷം വീണ്ടും രോഗം സ്ഥിരീകരിച്ചു. 33 കാരനായ യുവാവിനാണ് കൊവിഡ് രോഗമുക്തി നേടി നാലരമാസത്തിന് ശേഷം വീണ്ടും കൊവിഡ് സ്ഥിരീകരിച്ചതെന്ന് ഹോങ്കോങ് ശാസ്ത്രജ്ഞന്മാര്‍ പറഞ്ഞു.
