സ്വപ്നയ്ക്ക് കിട്ടിയ പണം കൈക്കൂലിയെന്ന് വിജിലൻസ്

കഴിഞ്ഞ വ‍ര്‍ഷം ഓഗസ്റ്റ് രണ്ടിന് കവടിയാ‍റിൽ വെച്ചാണ് കോൺസുലേറ്റ് ജീവനക്കാരനായ ഈജിപ്ഷ്യൻ പൗരൻ ഖാലിദ് അലി ഷൗക്രിക്ക് യുണിടാക്ക് ഉടമ പണം കൈമാറുന്നത്. 3.80 കോടിയായിരുന്നു കമ്മീഷൻ. 1.50 കോടി ഇന്ത്യൻ രൂപയും ശേഷിക്കുന്നത് ഡോളറുമായാണ് നൽകിയത്. ഈ തുക നാല് ദിവസം കൈവശം വെച്ചതിനു ശേഷമാണ് കമ്മീഷൻ ലഭിച്ച വിവരം ഖാലിദ് സ്വപ്നയെ അറിയിച്ചതെന്നും റിപ്പോ‍ര്‍ട്ടിൽ പറയുന്നു.

സരിത്തും സ്വപ്നയും ഖാലിദിന്റെ വീട്ടിലെത്തിയാണ് പണം കൈപ്പറ്റിയത്. പണം എത്രയുണ്ടെന്ന് സ്വപ്നക്ക് അറിയില്ലായിരുന്നു. വലിയ സംഖ്യയാണെന്നും സൂക്ഷിച്ചു കൊണ്ടുപോകണമെന്നും ഖാലിദ് പറഞ്ഞു. 64 ലക്ഷം രൂപ എസ്ബിഐ ലോക്കറിലും ബാക്കിയുള്ളത് ഫെഡറൽ ബാങ്ക് ലോക്കറിലും വെച്ചു. പണമിടപാട് സംബന്ധിച്ച് ശിവശങ്കറിന് അറിയാമായിരുന്നു എന്നാണ് സ്വപ്നയുടെ മൊഴി. എന്നാൽ കമ്മീഷൻ തുക അദ്ദേഹത്തിനാണെന്ന് നേരിട്ട് പറഞ്ഞിട്ടില്ലെന്നും സ്വപ്ന മൊഴി നൽകി.

ലൈഫ് മിഷൻ സിഇഒ യുവി ജോസിന്റെ മൊഴിയും വിജിലൻസ് രേഖപ്പെടുത്തിയിട്ടുണ്ട്. ശിവശങ്ക‍ര്‍ നടത്തിയ സ്വകാര്യ വാട്സാപ്പ് വിവരങ്ങളും ശേഖരിച്ചു. ലൈഫ് മിഷൻ പദ്ധതിയുടെ വിവരങ്ങൾ കൈമാറാൻ ശിവശങ്ക‍ര്‍ ആവശ്യപ്പെടുന്നതിന്റെ സന്ദേശങ്ങളടക്കം വിജിലൻസിന് ലഭിച്ചു.