യാത്രാ വിലക്ക്; മലയാളികള്‍ ഉള്‍പ്പെടെ നിരവധി പേര്‍ ദുബായില്‍ കുടുങ്ങി
Travel ban; Many people, including Malayalees, were stranded in Dubai
ദുബായ്: യൂറോപ്യന്‍ രാജ്യങ്ങളിലെ കൊറോണയുടെ രണ്ടാംവരവിനെ തുടര്‍ന്ന് സൗദി അറേബ്യ പ്രഖ്യാപിച്ച അപ്രതീക്ഷിത യാത്രാവിലക്കില്‍ മലയാളികള്‍ ഉള്‍പ്പടെ നിരവധി യാത്രക്കാര്‍ ദുബായില്‍ കുടുങ്ങി. നിലവില്‍ ഒരാഴ്ചത്തേക്കാണ് സൗദി കര-വ്യോമ-ജല അതിര്‍ത്തികള്‍ അടച്ചതെങ്കിലും യാത്രാവിലക്ക് നീളാനിടയുണ്ടെന്ന് സൗദി ആഭ്യന്തര മന്ത്രാലയം അറിയിച്ചിരുന്നു. ഇതോടെ അടുത്ത ദിവസങ്ങളിലായി സൗദിയിലേക്ക് ടിക്കറ്റ് ബുക്ക് ചെയ്ത ഒട്ടേറെ പേരുടെ യാത്രയാണ് അനിശ്ചിതത്വത്തിലായത്.
സൗദിയിലെത്തുന്നതിന് മുമ്പ് ഇന്ത്യ അടക്കമുള്ള രാജ്യങ്ങളില്‍ നിന്നുള്ളവര്‍ മറ്റൊരു രാജ്യത്ത് 14 ദിവസം ക്വാറന്റൈനില്‍ കഴിയണമെന്ന വ്യവസ്ഥ നിലവിലുണ്ട്. ഇതിന്റെ അടിസ്ഥാനത്തില്‍ ദുബായ് ഹോട്ടലുകളില്‍ കഴിയുന്നവരുടെ യാത്രയാണ് പുതിയ നടപടിയോടെ പ്രതിസന്ധിയിലായത്. യുഎഇ വിമാന കമ്പനികളാവട്ടെ, സൗദി ഉള്‍പ്പെടെയുള്ള രാജ്യങ്ങളിലേക്കുള്ള സര്‍വീസുകള്‍ നിര്‍ത്തിവച്ചിരിക്കുകയുമാണ്.
സൗദിയില്‍ സ്‌കൂളുകള്‍ക്ക് അവധിയായതിനാല്‍ ദുബായ് സന്ദര്‍ശിക്കാനെത്തിയവരും എന്നു മടങ്ങാനാകുമെന്നറിയാത്ത സ്ഥിതിയിലാണ്.
ബ്രിട്ടനിലും മറ്റു യൂറോപ്യന്‍ രാജ്യങ്ങളിലും ജനിതകമാറ്റം സംഭവിച്ച കോവിഡ് പടരുന്ന സാഹചര്യത്തിലാണ് സൗദി അറേബ്യ രാജ്യാന്തര അതിര്‍ത്തികള്‍ അടച്ചത്. രാജ്യത്തിനകത്തേക്കും പുറത്തേക്കുമുള്ള എല്ലാ വിദേശ വിമാന സര്‍വീസുകളും റദ്ദാക്കുകയും ചെയ്തിട്ടുണ്ട്.
