റിപബ്ലിക് ദിനത്തിൽ ഡൽഹി നഗരത്തിൽ ട്രാക്ടര് റാലി; അന്ത്യശാസനവുമായി കർഷകർ
Tractor rally in Delhi on Republic Day; Farmers with an ultimatum
ന്യൂഡൽഹി: വിവാദവിഷയങ്ങളിൽ തീരുമാനം വൈകുന്ന സാഹചര്യത്തിൽ കേന്ദ്രസര്‍ക്കാരിനെതിരെ പ്രതിഷേധം കടുപ്പിക്കാൻ കര്‍ഷക സംഘടനകള്‍. ആവശ്യങ്ങള്‍ അംഗീകരിച്ചില്ലെങ്കിൽ ജനുവരി 26 റിപബ്ലിക് ദിനത്തിൽ ഡൽഹി നഗരത്തിൽ പ്രവേശിക്കുമെന്ന് കര്‍ഷക സംഘടനകള്‍ മുന്നറിയിപ്പ് നല്‍കി. കുറഞ്ഞ താങ്ങുവില നിയമം വഴി ഉറപ്പു നല്‍കണമെന്നും വിവാദമായ കാര്‍ഷിക നിയമങ്ങള്‍ പിൻവലിക്കണമെന്നതുമാണ് കര്‍ഷകസംഘടനകളുടെ ആവശ്യം.
കേന്ദ്രസര്‍ക്കാര്‍ ആവശ്യങ്ങള്‍ ഉന്നയിച്ചില്ലെങ്കിൽ റിപബ്ലിക് ദിന പരിപാടികള്‍ക്കിടെ ഡൽഹി നഗരത്തിലേയ്ക്കും രാജ്യത്തിൻ്റെ മറ്റു കേന്ദ്രങ്ങളിലും ട്രാക്ടര് റാലി നടത്തുമെന്നാണ് പ്രതിഷേധരംഗത്തുള്ള കര്‍ഷക സംഘടനകളെ ഏകോപപ്പിക്കുന്ന സംയുക്ത കര്‍ഷക യൂണിയൻ അറിയിച്ചിട്ടുള്ളത്. റിപബ്ലിക് ദിനത്തിൽ ബ്രിട്ടീഷ് പ്രധാനമന്ത്രി ബോറിസ് ജോൺസണാണ് മുഖ്യാതിഥി. സമാധാനപരമായും അക്രമരഹിതമായും ട്രാക്ടര് റാലി സംഘടിപ്പിക്കാനാണ് പദ്ധതിയിടുന്നതെന്നും സംഘടനകള്‍ അറിയിച്ചു. നിലവിൽ ഡൽഹിയിലേയ്ക്കുള്ള അതിർത്തികളിൽ തമ്പടിച്ചിരിക്കുകയാണ് പതിനായിരക്കണക്കിന് കർഷകർ.
പ്രതിഷേധരംഗത്തുള്ള കര്‍ഷകര്‍ ഉന്നയിച്ച നാല് ആവശ്യങ്ങളിൽ രണ്ടെണ്ണം കേന്ദ്രസര്‍ക്കാര്‍ കഴിഞ്ഞ ദിവസം അംഗീകരിച്ചിരുന്നു. എന്നാൽ വിവാദമായ മൂന്ന് കാര്‍ഷിക നിയമങ്ങളും പിൻവലിക്കില്ലെന്ന് കേന്ദ്രം ഉറപ്പിച്ചു പറയുന്ന സാഹചര്യത്തിലാണ് പ്രതിഷേധക്കാര്‍ തുടര്‍നടപടികള്‍ ആലോചിക്കുന്നത്. ജനുവരി 26ന് ഡൽഹി നഗരത്തിനുള്ളിലേയ്ക്ക് ട്രാക്ടര് റാലി നടത്താനാണ് കര്‍ഷകര്‍ ആലോചിക്കുന്നത്.
ജനുവരി 4നാണ് കര്‍ഷകരുമായി കേന്ദ്രസര്‍ക്കാരിൻ്റെ അടുത്ത ചര്‍ച്ച. രാജ്യത്ത് ഉത്പാദിപ്പിക്കുന്ന 23 വിളകള്‍ക്ക് കുറഞ്ഞ താങ്ങുവില ഉറപ്പു നല്‍കുന്ന താങ്ങുവില നിയമം നടപ്പാക്കണമെന്നാണ് കര്‍ഷകരുടെ ആവശ്യം. ഡിസംബര്‍ 30ന് കര്‍ഷകരുമായി നടത്തിയ ചര്‍ച്ചയിൽ കേന്ദ്രസര്‍ക്കാര്‍ വൈക്കോൽ കത്തിക്കുന്ന കര്‍ഷകര്‍ക്കെതിരെയുള്ള ക്രിമിനൽ നടപടികള്‍ അവസാനിപ്പിക്കാമെന്നും വൈദ്യുതി നിയമഭേദഗതിയിലെ വകുപ്പുകള്‍ ഉപേക്ഷിക്കാമെന്നും ഉറപ്പു നല്‍കിയിരുന്നു.
