ഇന്ത്യയിൽ ആദ്യമായി പച്ചക്കറികൾക്ക് തറവില പ്രഖ്യാപിക്കാനൊരുങ്ങി സംസ്ഥാന സർക്കാർ

തിരുവനന്തപുരം: സംസ്ഥാനത്തെ കർഷകർ ഉത്പാദിപ്പിക്കുന്ന വിളകൾക്ക് കൃത്യമായ വില ഉറപ്പുവരുത്തുക എന്ന ലക്ഷ്യവുമായി 16 ഇനങ്ങൾക്ക് തറവില പ്രഖ്യാപിക്കാൻ സംസ്ഥാന സർക്കാർ. പ്രതിസന്ധിയിലായ കാർഷികമേഖലയെ സംരക്ഷിക്കാനാണ് നടപടിയെന്നാണ് കൃഷിമന്ത്രി വി എസ് സുനിൽകുമാർ വ്യക്തമാക്കുന്നത്. ഇതാദ്യമായാണ് രാജ്യത്ത് ഒരു സംസ്ഥാന സർക്കാർ പച്ചക്കറികൾക്ക് തറവില പ്രഖ്യാപിക്കുന്നത്. വിളകൾക്ക് താങ്ങുവില പ്രഖ്യാപിക്കാനുള്ള അവകാശം കേന്ദ്രസർക്കാരിനായതിനാലാണ് സംസ്ഥാന സർക്കാർ തറവില പ്രഖ്യാപിക്കുന്നതെന്ന് കൃഷിമന്ത്രി പറഞ്ഞതായി റിപോർട്ടുകൾ പറയുന്നു.

ഉത്പാദനവിലയുടെ 20 ഇരട്ടിയോളമായിരിക്കും തറവില. മുഖ്യമന്ത്രി പിണറായി വിജയനാണ് ഇന്ന് പ്രഖ്യാപനം നടത്തുക. അതേസമയം, സവാള വില കുതിച്ചുയരുന്ന സാഹചര്യത്തിൽ കേരളത്തിൽ കുറഞ്ഞ വിലയ്ക്ക് സവോള ലഭ്യമാക്കാനുള്ള നടപടികളും സംസ്ഥാന സർക്കാർ ആരംഭിച്ചു. സപ്ലൈകോ വഴിയും കൺസ്യൂമർഫെഡ്, ഹോർട്ടികോർപ്പ് എന്നീ സ്ഥാപനങ്ങൾ വഴിയും മറ്റു സംസ്ഥാനങ്ങളിൽ നിന്ന് സവോള നേരിട്ട് ശേഖരിക്കാനാണ് പദ്ധതി. നാഫെഡിൽ നിന്ന് 1800 ടൺ സവോള വാങ്ങാനാണ് സംസ്ഥാന സ‍ര്‍ക്കാര്‍ തീരുമാനിച്ചിട്ടുള്ളത്. സപ്ലൈകോ വഴി ആയിരം ടണ്ണും കൺസ്യൂമ‍ര്‍ഫെഡ് വഴി 300 ടണ്ണും സവോള വാങ്ങും. ഹോ‍ര്‍ട്ടികോര്‍പ്പ് വഴി 500 ടൺ സവോളയാണ് ശേഖരിക്കുക. ഇത് നവംബർ മാസം മുതൽ വിതരണം ചെയ്തു തുടങ്ങും. സവോളയ്ക്ക് സംസ്ഥാനത്ത് വൻതോതിൽ കൃഷിയില്ലാത്ത തക്കാളി, ഉള്ളി, ഉരുളക്കിഴങ്ങ് എന്നിവയും കേന്ദ്രസര്‍ക്കാര്‍ വഴി സംഭരണകേന്ദ്രങ്ങളിൽ നേരിട്ട് ശേഖരിക്കാനാണ് സര്‍ക്കാരിൻ്റെ പദ്ധതി. ഇക്കാര്യത്തിൽ തമിഴ്നാടിനും കര്‍ണാടകത്തിനും കത്തയച്ചതായും മുഖ്യമന്ത്രി വ്യക്തമാക്കിയിരുന്നു.

കേരളത്തിലേയ്ക്ക് വലിയ തോതിൽ പച്ചക്കറി എത്തുന്ന കര്‍ണാടക, തമിഴ്നാട്, ആന്ധ്രാ പ്രദേശ് എന്നീ സംസ്ഥാനങ്ങളിൽ പെയ്ത മഴയാണ് വിപണിയിൽ വില ഉയരാൻ കാരണമായതെന്നാണ് വ്യാപാരികളെ ഉദ്ധരിച്ചുള്ള റിപ്പോര്‍ട്ടുകള്‍. കനത്ത മഴയെത്തുടര്‍ന്ന് ഉത്പാദനവും കയറ്റുമതിയും ഇടിയുകയും വില ഉയരുകയുമായിരുന്നു.