76 കിലോമീറ്റർ ജലമെട്രോ ഫെബ്രുവരി 22 ന് ഉദ്ഘാടനം
The 76 km water metro will be inaugurated on February 22
തിരുവനന്തപുരം: കൊച്ചി ജലമെട്രോയുടെ ആദ്യഘട്ട ഉദ്ഘാടനം ഫെബ്രുവരി 22ന്. മുഖ്യമന്ത്രി പിണറായി വിജയൻ ഓൺലൈനായാണ് ഉദ്ഘാടനം നിർവ്വഹിക്കുക. വൈറ്റില-കാക്കനാട് പാതയിലുള്ള സർവ്വീസാണ് ആദ്യം ആരംഭിക്കുക.
വൈറ്റില മൊബിലിറ്റി ഹബ്ബിലെ ടെർമിനലിൽ നിന്നും കാക്കനാട് ടെർമിനലിലേക്കാണ് ആദ്യ സർവ്വീസ്. ബാറ്ററി ഉപയോഗിച്ച് പ്രവർത്തിക്കുന്ന 23 അത്യാധുനിക ബോട്ടുകൾ സർവ്വീസിന് തയ്യാറായിക്കഴിഞ്ഞു. കൊച്ചിൻ ഷിപ്പ് യാർഡാണ് മെട്രോയ്ക്കാവശ്യമായ ബോട്ടുകൾ നിർമ്മിക്കുന്നത്. 78 ബോട്ടുകൾ നിർമ്മിക്കാനുള്ള കരാറാണ് കെഎംആർഎൽ ഷിപ്പ് യാർഡിന് നൽകിയിരിക്കുന്നത്.
കൊച്ചിയിലെ പത്ത് ദ്വീപുകളെ ജലമെട്രോ വഴി ബന്ധിപ്പിക്കും. 76 കിലോമീറ്റർ ദൈർഘ്യമുള്ള ജലപാതയിൽ 38 ടെർമിനലുകൾ ഉണ്ടായിരിക്കും. ഒരു വർഷം മുമ്പാണ് ജലമെട്രോയ്ക്ക് സ്ഥലം ഏറ്റെടുക്കാൻ സർക്കാർ അനുമതി നൽകിയത്. പത്ത് മാസംകൊണ്ട് പദ്ധതി പൂർത്തിയാക്കാനായിരുന്നു ശ്രമം.
കൊച്ചി കോർപ്പറേഷനു പുറമേ മൂന്ന് മുനിസിപ്പാലിറ്റികൾ പദ്ധതിയുടെ ഭാഗമാകും. 100 പേർക്ക് യാത്ര ചെയ്യാവുന്ന 23 ബോട്ടുകളും 53 പേർക്ക് യാത്രചെയ്യാവുന്ന 55 ബോട്ടുകളുമാണ് പദ്ധതിയിലുള്ളത്.
