36 വയസ്സുള്ള ആമിനയും 68 വയസ്സുള്ള മാധവിയും 52 കാരി അൽഫോൻസയും ഒന്നു സ്വസ്ഥമായിട്ടിരുന്നത് ഇന്നാണ്! നാട്ടുവർത്തമാനങ്ങൾ പറഞ്ഞു ചിരിച്ചും കുടുംബ കാര്യങ്ങൾ പറഞ്ഞും അവരങ്ങനെ രാവിലെ തന്നെ ഒത്തുകൂടി! ബുധനാഴ്ച്ചയായതോണ്ട് പള്ളീം അമ്പലവുമൊന്നും ബാധിക്കുന്നില്ല, കെട്ടിയവന് വെച്ചുവിളമ്പേണ്ട ,മക്കളെക്കുറിച്ചും ആധിയില്ല’ പെട്ടെന്നാണ് അയാൾ കടന്നു വന്നത്. പത്രത്തിലെ ചരമ കോളമുള്ള ആ പേജ് അയാൾ ചായക്കടയിലെ മേശപ്പുറത്തേക്ക് വലിച്ചെറിഞ്ഞു! “ഈ 2050 ൽ പോലും ഇവിടുത്തെ പത്രക്കാർക്ക് ബോധം വരില്ലേ? വ്യത്യസ്ത മതസ്ഥരായ മൂന്നു പരേതകളുടേയും ഫോട്ടോ അടുത്തടുത്തിടാൻ ഇവർക്കെങ്ങനെ ധൈര്യം വന്നു? കേസു കൊടുക്കണം ചേട്ടൻമാരേ കേസ്: ” അയാൾ പുലമ്പിക്കൊണ്ടിരുന്നു”.
