സൗരവ് ഗാംഗുലിയും രാഷ്ട്രീയത്തിലേക്ക്; ബംഗാള്‍ ഗവര്‍ണറെ കണ്ടു
Sourav Ganguly also enters politics; Met the Governor of Bengal
കൊല്‍ക്കത്ത: ബിസിസിഐ അധ്യക്ഷനും മുന്‍ ഇന്ത്യന്‍ ക്രിക്കറ്റ് ടീം നായകനുമായ സൗരവ് ഗാംഗുലി ബംഗാൾ ഗവർണറെ സന്ദർശിച്ചു. ഗാംഗുലി രാഷ്ട്രീയത്തിലേക്കെന്ന അഭ്യൂഹങ്ങൾ ഉയരുന്നതിനിടെയാണ് അദ്ദേഹം ഗവർണർ ജഗ്ദീപ് ധന്‍കറുമായി കൂടിക്കാഴ്ച നടത്തിയത്. കൊൽക്കത്തയിലെ രാജ് ഭവനിലായിരുന്നു സന്ദർശനം.
‘ഉപചാരപൂർവ്വമുള്ള സന്ദർശനം’ എന്നാണ് ഗാംഗുലി സന്ദർശനത്തെക്കുറിച്ച് പറഞ്ഞത്. ഞായറാഴ്ച നടന്ന കൂടിക്കാഴ്ച എന്തെങ്കിലും രാഷ്ട്രീയ അർഥമില്ലെന്ന് ബിജെപിയും പറഞ്ഞു. സംസ്ഥാനത്ത് തൃണമൂൽ സർക്കാരും ഗവർണറുടെ ഓഫീസും പലപ്പോഴും രണ്ട് തട്ടിലാണെന്ന റിപ്പോർട്ടുകൾ പുറത്തു വന്നിരുന്നു. തൃണമൂൽ കോൺഗ്രസ് രാജ് ഭവനെ ബിജെപിയുടെ സ്റ്റേറ്റ് ഓഫീസ് എന്ന് വിശേഷിപ്പിച്ചതുമെല്ലാം നേരത്തെ ചർച്ചയായിരുന്നു. ഈ സാഹചര്യത്തിലാണ് ഗാംഗുലിയുടെ സന്ദർശന വാർത്തയും പുറത്ത് വരുന്നത്.
‘ബിസിസിഐ അധ്യക്ഷന്‍ സൗരവ് ഗാംഗുലിയുമായി വിവിധ വിഷയങ്ങളില്‍ ആശയവിനിമയം നടത്തി. 1864-ല്‍ സ്ഥാപിതമായ രാജ്യത്തെ ഏറ്റവും പഴയ ക്രിക്കറ്റ് മൈതാനമായ ഈഡന്‍ ഗാര്‍ഡന്‍ സന്ദര്‍ശിക്കാനുള്ള അദ്ദേഹത്തിന്‍റെ ക്ഷണം സ്വീകരിച്ചു,’ ഗാംഗുലിക്കൊപ്പമുള്ള ഫോട്ടോ ട്വീറ്റ് ചെയ്ത് ഗവര്‍ണര്‍ ജഗ്ദീപ് ധന്‍കർ കുറിച്ചു.
നിയമസഭ തെരഞ്ഞെടുപ്പ് അടുത്തിരിക്കുന്ന സംസ്ഥാനത്ത് സൗരവ് ഗാംഗുലി രാഷ്ട്രീയ പ്രവേശനം നടത്തുമെന്ന രീതിയിൽ അഭ്യൂഹങ്ങൾ നേരത്തെ ഉയർന്നിരുന്നു. സംസ്ഥാനത്ത് ഏത് വിധേനയും അധികാരം പിടിക്കാനുള്ള പ്രവർത്തനങ്ങളുമായാണ് ബിജെപിയും മുന്നോട്ട് പോകുന്നത്. ഈ സാഹചര്യത്തിൽ തന്നെ ഗാംഗുലി ഗവർണറെ കണ്ടതാണ് അഭ്യൂഹങ്ങൾ ഉയർത്തുന്നത്. അതേസമയം കഴിഞ്ഞദിവസം നടന്ന കൂടിക്കാഴ്ച രാഷ്ട്രീയപരമല്ലെന്ന് ബിജെപിയും പറയുന്നു.
