സ്‌കൂള്‍ ബാഗിന് അമിതഭാരം വേണ്ട; നിര്‍ദേശങ്ങളുമായി കേന്ദ്രസര്‍ക്കാര്‍
School bag should not be overweight; Central Government with instructions
ന്യൂഡല്‍ഹി: വിദ്യാര്‍ഥികളുടെ സ്‌കൂള്‍ ബാഗിന് അമിതഭാരം വേണ്ടെന്ന് സംസ്ഥാനങ്ങള്‍ക്ക് നിര്‍ദേശങ്ങളുമായി കേന്ദ്ര സര്‍ക്കാര്‍. പത്ത് ദിവസമെങ്കിലും സ്‌കൂള്‍ ബാഗിന്റെ ഭാരമില്ലാതെ വിദ്യാര്‍ഥികള്‍ക്ക് സ്‌കൂളില്‍ പോകാനുള്ള അവസരമൊരുക്കണമെന്നാണ് കേന്ദ്രസര്‍ക്കാരിന്റെ നിര്‍ദേശം. പുതിയ ദേശീയ വിദ്യാഭ്യാസ നയം നടപ്പില്‍ വരുന്നതിന്റെ ഭാഗമായിട്ടാണ് ഈ മാറ്റം.
ഒന്നാം ക്ലാസ് മുതല്‍ 12ാം ക്ലാസ് വരെയുള്ള വിദ്യാര്‍ഥികള്‍ക്ക് പത്ത് ദിവസമെങ്കിലും ബാഗിന്റെ ഭാരമില്ലാതെ ക്ലാസില്‍ പോകാനുള്ള സാഹചര്യം ഒരുക്കണമെന്ന് കേന്ദ്ര സര്‍ക്കാര്‍ വിവിധ സംസ്ഥാനങ്ങള്‍ക്ക് അയച്ച കത്തില്‍ വ്യക്തമാക്കുന്നു. മാത്രമല്ല, വിദ്യാര്‍ഥികള്‍ക്ക് തൊഴിലധിഷ്ഠിത വിദ്യാഭ്യാസം ലഭിക്കാനുള്ള സാഹചര്യവും നല്‍കണമെന്ന് കേന്ദ്രം വ്യക്തമാക്കുന്നു.
ഒന്നാം ക്ലാസ് മുതല്‍ പത്താം ക്ലാസ് വരെയുള്ള വിദ്യാര്‍ഥികളുടെ ബാഗിന്റെ ഭാരം അവരുടെ ശരീരഭാരത്തിന്റെ പത്ത് ശതമാനത്തില്‍ കൂടാന്‍ പാടില്ലെന്നും നിര്‍ദേശം നല്‍കിയിട്ടുണ്ട്. കൂടാതെ, പ്രീ പ്രൈമറി സ്‌കൂളിലെ വിദ്യാര്‍ഥികള്‍ക്ക് ബാഗ് വേണ്ടെന്ന് കേന്ദ്രം അയച്ച കത്തില്‍ പറയുന്നു.
ബാഗിന്റെ ഭാരം പരിശോധിക്കാന്‍ ഓരോ സ്‌കൂളിനും ഡിജിറ്റല്‍ മെഷീന്‍ നിര്‍ബന്ധമാക്കും. ബാഗുകള്‍ ഭാരം കുറഞ്ഞതും രണ്ട് ചുമലിലും തൂക്കിയിടാന്‍ സാധിക്കുന്നതുമായിരിക്കണം. കൊവിഡ് പ്രതിസന്ധിയ്ക്ക് ശേഷം വിദ്യാര്‍ഥികള്‍ സ്‌കൂളിലെത്തുമ്പോള്‍ ഈ പരിഷ്‌കാരങ്ങള്‍ പ്രാവര്‍ത്തികമാക്കണമെന്നും കത്തില്‍ നിര്‍ദേശിക്കുന്നു.
