ശബരിമല ‘സ്വാമി പ്രസാദം’ ഇനി വീട്ടുമുറ്റത്ത്; വിതരണം തപാൽ വകുപ്പ്
Sabarimala 'Swami Prasadam' now in backyard; Distribution Postal Department
തിരുവനന്തപുരം: ശബരിമല ഭക്തര്ക്ക് പ്രസാദം വീട്ടിലേക്ക് എത്തിക്കാനുള്ള സൗകര്യവുമായി തപാൽ വകുപ്പ്. രാജ്യത്തുടനീളമുള്ള ഭക്തരുടെ പക്കലേക്ക് പുതിയ മാര്ഗത്തിലൂടെ പ്രസാദം എത്തിക്കാന് സാധിക്കുമെന്നതാണ് പ്രത്യേകത.
അയ്യപ്പ ഭക്തര്ക്ക് ഇന്ത്യയിലുള്ള ഏത് പോസ്റ്റ് ഓഫീസിൽ നിന്നും ഈ പ്രസാദം ബുക്ക് ചെയ്യുവാന് സാധിക്കും. 450 രൂപയായിരിക്കും ഓരോ പാക്കറ്റ് പ്രസാദത്തിനും ഈടാക്കുന്നത് എന്ന് ആശയവിനിമയ മന്ത്രാലയം അറിയിച്ചു.
ഒരു സമയം ഒരു ഭക്തന് 10 പാക്കറ്റുകൾ വരെ ബുക്ക് ചെയ്യാന് സാധിക്കും. സ്പീഡ് പോസ്റ്റ് പ്രകാരം പ്രസാദം ബുക്ക് ചെയ്ത് കഴിഞ്ഞാൽ ഉടൻ തന്നെ ഒരു സന്ദേശം എസ്എംഎസ് മുഖാന്തരം ഫോണിലേക്ക് എത്തുകയും ചെയ്യും. അതിന് പുറമെ, ഇന്ത്യ പോസ്റ്റ് വെബ്സൈറ്റിൽ ലോഗ് ഇൻ ചെയ്തുകൊണ്ട് ഭക്തര്ക്ക് പ്രസാദത്തെ ട്രാക്ക് ചെയ്യുവാനും സാധിക്കുമെെന്നും മന്ത്രാലയം അറിയിച്ചു.
2020 നവംബർ ആറ് മുതൽ ഈ സേവനം ഇന്ത്യയിലുടനീളം ആരംഭിച്ചിരുന്നു. ഇതിന് പൊതുജനങ്ങളിൽ നിന്ന് മികച്ച പ്രതികരണമാണ് ലഭിച്ചുകൊണ്ടിരിക്കുന്നത്. ഇന്നുവരെ ഇന്ത്യയിലുടനീളം ഏകദേശം 9,000 ഓർഡറുകൾ ബുക്ക് ചെയ്തിട്ടുണ്ട്, ഇത് അനുദിനം വർദ്ധിച്ചുകൊണ്ടിരിക്കുകയാണെന്നും ആശയവിനിമയ മന്ത്രാലയത്തെ ഉദ്ധരിച്ച് വാര്ത്താ ഏജന്സിയായ എഎൻഐ റിപ്പോര്ട്ട് ചെയ്യുന്നു.
അതിന് പുറമെ, ശബരിമലയിൽ വെർച്വൽ ക്യൂ ബുക്കിംഗ് ഇന്ന് ഉച്ചക്ക് 12 മണി മുതൽ ആരംഭിക്കുമെന്ന് അധികൃതര് അറിയിച്ചു. ഭക്തർക്ക് www.sabarimalaonline.org എന്ന സൈറ്റ് വഴി ദർശനത്തിനായി ബുക്ക് ചെയ്യാന് സാധിക്കും.
വെർച്വൽ ക്യൂവഴിയുള്ള തീർത്ഥാടകരുടെ എണ്ണം തിങ്കൾ മുതൽ വെള്ളി വരെ 2000 പേർ വീതം എന്ന രീതിയിലാണ്.നിലവിൽ ഇത് 1000 വീതം ആയിരുന്നു. ശനി, ഞായർ ദിവസങ്ങളിൽ 2000 വീതം എന്നത് 3000 വീതം ആയിരിക്കും.
