20 ലക്ഷം വാക്സിന് ഡോസ് മറികടന്ന് ഖത്തര്‍; കൗമാരക്കാര്‍ക്ക് ഇന്നു മുതല്‍ രജിസ്റ്റര്‍ ചെയ്യാം
Qatar surpasses 20 lakh vaccine dose; Teens can register from today
ദോഹ: ദേശീയ കൊവിഡ് വാക്സിനേഷന് ക്യാംപയിന്റെ ഭാഗമായി പുതിയൊരു ലക്ഷ്യം കൂടി മറികടന്നതായി ഖത്തര്‍ ആരോഗ്യമന്ത്രാലയം. രാജ്യം ഇന്നലെ 20 ലക്ഷം വാക്സിന് ഡോസ് എന്ന ലക്ഷ്യമാണ് മറികടന്നത്. ഇതിനകം 2,002,018 ഡോസ് വാക്സിനുകള്‍ ഖത്തര്‍ നിവാസികള്‍ക്ക് വിതരണം ചെയ്തുകഴിഞ്ഞതായി മന്ത്രാലയം അറിയിച്ചു. കഴിഞ്ഞ അഞ്ച് ദിവസങ്ങളില്‍ ദിവസേന 30,000ന് മുകളില്‍ ഡോസ് വാക്സിനുകളാണ് ഖത്തര്‍ നല്‍കിവരുന്നത്.
51.9 ശതമാനം പേര്‍ക്കും വാക്സിന് ലഭിച്ചു
രാജ്യത്തെ വാക്സിന് ലഭിക്കാന്‍ അര്‍ഹരായവരില്‍ 51.9 ശതമാനം പേര്‍ക്ക് വാക്സിന് നല്‍കിക്കഴിഞ്ഞതായും ആരോഗ്യമന്ത്രാലയം അറിയിച്ചു. ഇതില്‍ 1,177,725 പേര്‍ക്ക് ഒരു ഡോസ് വാക്‌സിനാണ് നല്‍കിയത്. 36.4 ശതമാനം ആളുകള്‍ക്ക് രണ്ട് ഡോസ് വാക്സിനും ലഭിച്ചു. 60 വയസ്സിന് മുകളിലുള്ള 88 ശതമാനത്തിലേറെ പേര്‍ക്ക് ഡോസ് വാക്സിനും 82 ശതമാനത്തിലേറെ പേര്‍ക്ക് രണ്ട് ഡോസ് വാക്സിനും ലഭിച്ചു.
കൗമാരക്കാര്‍ക്ക് വാക്സിന്; രജിസ്‌ട്രേഷന്‍ ഇന്നു മുതല്‍
അതിനിടെ, ഖത്തറില്‍ കുട്ടികള്‍ക്ക് വാക്സിന് നല്‍കാന്‍ ആഗ്രഹിക്കുന്ന രക്ഷിതാക്കള്‍ക്ക് ഞായറാഴ്ച മുതല്‍ ഖത്തര്‍ ആരോഗ്യ മന്ത്രാലയത്തിന്റെ www.moph.gov.qa എന്ന വെബ്‌സൈറ്റില്‍ രജിസ്റ്റര്‍ ചെയ്യണമെന്ന് അധികൃതര്‍ അറിയിച്ചു. 12നും 15നും ഇടയില്‍ പ്രായമുള്ള കുട്ടികള്‍ക്ക് ഫൈസര്‍ വാക്സിന് നല്‍കുമെന്ന് ഖത്തര്‍ ആരോഗ്യമന്ത്രാലയം നേരത്തേ അറിയിച്ചിരുന്നു. രജിസ്റ്റര്‍ ചെയ്തവരെ പ്രൈമറി ഹെല്‍ത്ത് കെയര്‍ കോര്‍പറേഷന്‍ നേരിട്ട് ബന്ധപ്പെട്ട് തുടര്‍നടപടികള്‍ നിര്‍ദേശിക്കും. കൗമാരക്കാരില്‍ ഫൈസര്‍ വാക്സിന് സുരക്ഷിതവും ഫലപ്രദവുമാണെന്ന് പരീക്ഷണങ്ങളില്‍ വ്യക്തമായതിനെ തുടര്‍ന്നാണ് ഖത്തറിന്റെ നടപടി. സപ്തംബറില്‍ പുതിയ അധ്യയന വര്‍ഷം ആരംഭിക്കുമ്പോള്‍ മുതിര്‍ന്ന കുട്ടികള്‍ക്ക് സുരക്ഷിതമായി ക്ലാസ്സുകളിലെത്താന്‍ ഇത് സഹായിക്കുമെന്ന വിലയിരുത്തലിലാണ് അധികൃതര്‍.
ഈദ് അവധിക്കു ശേഷം 30 കഴിഞ്ഞവര്‍ക്കും വാക്സിന്
അതിനിടെ, ഈദുല്‍ ഫിത്തര്‍ അവധി കഴിഞ്ഞാല്‍ രാജ്യത്തെ 30 വയസ്സിനു മുകളില്‍ പ്രായമുള്ള എല്ലാവര്‍ക്കും വാക്സിന് വിതരണം ആരംഭിക്കുമെന്ന് ഖത്തര്‍ ആരോഗ്യമന്ത്രാലയം നേരത്തേ അറിയിച്ചിരുന്നു. അതിനുള്ള നടപടികള്‍ ഉടന്‍ ആരംഭിക്കും. നിലവില്‍ 40 വയസ്സിനും അതിനു മുകളിലും പ്രായമുള്ളവര്‍ക്കാണ് ഖത്തറില്‍ വാക്സിന് നല്‍കി വരുന്നത്. ഫൈസര്‍, മൊഡേണ വാക്സിനുകളാണ് ഖത്തറില്‍ വിതരണം ചെയ്യുന്നത്. 12നും 15നുമിടയില്‍ പ്രായമുള്ള കുട്ടികള്‍ക്കും 30 വയസ്സിനു മുകളിലുള്ളവര്‍ക്കും വാക്സിന് വിതരണം ആരംഭിക്കുന്നതോടെ വരുംദിവസങ്ങളില്‍ രാജ്യത്ത് വാക്സിനേഷന് ക്യാംപയിന്‍ കൂടുതല്‍ ശക്തിപ്പെടുമെന്ന വിലയിരുത്തലിലാണ് ആരോഗ്യ മന്ത്രാലയം.
