ഖത്തര്‍ ലോകകപ്പിന് എത്തുന്നവരെല്ലാം വാക്സിന് എടുത്തുവെന്ന് ഉറപ്പാക്കാന്‍ പദ്ധതി
Qatar plans to make sure everyone who arrives for the World Cup is vaccinated
ദോഹ: 2022ല്‍ ഖത്തറില്‍ നടക്കുന്ന ഫിഫ ഫുട്ബോള്‍ ലോക കപ്പ് മല്‍സരത്തിനെത്തുന്ന മുഴുവന്‍ പേരും വാക്‌സിനേഷന്‍ പൂര്‍ത്തിയാക്കി എന്ന് ഉറപ്പ് വരുത്തുന്നതിന് പദ്ധതി ആസൂത്രണം ചെയ്തുവരുന്നതായി ഖത്തര്‍ ഉപപ്രധാന മന്ത്രിയും വിദേശകാര്യ മന്ത്രിയുമായ ശെയ്ഖ് മുഹമ്മദ് ബിന്‍ അബ്ദുല്‍ റഹ്മാന്‍ അല്‍താനി. ഇന്ത്യന്‍ വിദേശകാര്യ മന്ത്രാലയവുമായി സഹകരിച്ച് ഒബ്‌സര്‍വര്‍ റിസര്‍ച്ച് ഫൗണ്ടേഷന്‍ സംഘടിപ്പിച്ച റെയ്‌സിന ഡയലോഗില്‍ സംസാരിക്കുകയായിരുന്നു അദ്ദേഹം.
ഇക്കാര്യത്തില്‍ വാക്സിന് കമ്പനികളുമായി ചര്‍ച്ചകള്‍ പുരോഗമിക്കുന്നതായി അല്‍താനി പറഞ്ഞു. ഇക്കാര്യം സാധ്യമാവുമെന്നാണ് കരുതുന്നത്. ഒരു കൊവിഡ് രഹിത ടൂര്‍ണമെന്റ് സംഘടിപ്പിക്കാനാവുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേര്‍ത്തു. ലോകകപ്പ് മല്‍സരങ്ങളില്‍ പങ്കെടുക്കുന്ന താരങ്ങള്‍, ടീം ഒഫീഷ്യലുകള്‍, കാണികള്‍ തുടങ്ങിയ എല്ലാവരും വാക്സിന്റെ രണ്ടാം ഡോസ് എടുത്ത് രണ്ടാഴ്ച കഴിഞ്ഞാണ് ഖത്തറിലെത്തുന്നത് എന്ന് ഉറപ്പാക്കാനാണ് ഖത്തര്‍ ശ്രമിക്കുന്നത്.
ആഗോള സമൂഹം നേരിടുന്ന ഏറ്റവും ഗുരുതരമായ പ്രശ്നങ്ങള്‍ ചര്‍ച്ച ചെയ്യുന്ന പ്രധാന സമ്മേളനമാണ് റൈസിന ഡയലോഗ്. കൊവിഡിന്റെ പശ്ചാത്തലില്‍ ഓണ്‍ലൈന്‍- ഓഫ് ലൈന്‍ രീതികള്‍ സമന്വയിപ്പിച്ചാണ് ഇത്തവണ പരിപാടി സംഘടിച്ചത്.
