കവിത: പാഥേയരെ കാത്തിരിക്കും പാതകൾ _ സബിത മുഹമ്മദലി, ഒറ്റപ്പാലം

യാത്രക്കാരെ കാത്തിരിക്കുന്ന വഴികൾ
ഒരുപാടുണ്ടീ ഭൂമിയിൽ
ഒരു വേളയെങ്കിലും
തങ്ങളുടെ യാത്രികരെ
ഒരു നോക്കു കാണാൻ
കൊതിയോടെ കാത്തിരിക്കുന്ന
യാത്രക്കാരുടെ
സർവ്വ മംഗളത്തിനായ്
പ്രാർത്ഥനാനിരതമായ
ദിവ്യവഴികൾ
സ്വർഗത്തിലേക്കുള്ള
കാരുണ്യത്തിന്റെ പാതകൾ
ഭൂമിയിലെ മനുഷ്യർക്ക്
സ്വർഗത്തിലെത്താൻ
സർവ്വേശ്വരൻ കനിഞ്ഞരുളിയ
കനിവിന്റെ മാർഗങ്ങൾ
വ്യദ്ധ സദനങ്ങളിലും
തറവാട്ടു കോലായികളിലും
ഉപയോഗശൂന്യമായ്
ആരോഗ്യവും
ആനന്ദവുമില്ലാതെ
പ്രതീക്ഷകളിൽ
തിമിരം ബാധിച്ചു കിടക്കുകയാണവർ
അവരുടെ വ്യഥകൾക്ക്
കാരണം യാത്രികരുടെ
തിരക്കാണ്
ഉപഭോഗ തൃഷ്ണയിൽ
ഭൂമിയിൽ സ്വപ്നസ്വർഗം
പണിയുവാനുള്ള
തിടുക്കത്തിലാണ്
എന്നിട്ടുമാ
പാതകൾ
പാഥേയർക്കായി
പ്രാർത്ഥനയോടെ
കാത്തിരിപ്പാണ് !