മുല്ലപ്പെരിയാർ ഡാം സുരക്ഷിതം, മറുപടിയുമായി എം കെ സ്റ്റാലിൻ

മുല്ലപ്പെരിയാർ ഡാം സുരക്ഷിതമാണെന്ന് ഉറപ്പ് നൽകുന്നുവെന്ന് എം കെ സ്റ്റാലിൻ കത്തിയിൽ പറയുന്നു. 2021 ഫെബ്രുവരിയിൽ കേന്ദ്ര ജല കമ്മീഷൻ അംഗീകരിച്ച റൂൾ കർവ്, ഗേറ്റ് ഓപ്പറേഷൻ ഷെഡ്യൂൾ എന്നിവ അനുസരിച്ചാണ് ഡാമിലെ ജലനിരപ്പ് ക്രമീകരിക്കുന്നത്. ഓഗസ്റ്റ് ആദ്യവാരം മിതമായ രീതിയിലായിരുന്നു അണക്കെട്ടിലേക്കുള്ള നീരൊഴുക്ക്. അണക്കെട്ടിന്റെ വൃഷ്ടിപ്രദേശത്തു ലഭിക്കുന്ന മഴ, അണക്കെട്ടിന്റെ താഴത്തെ പ്രദേശങ്ങളിലെ മഴയെക്കാൾ താരതമ്യേന കുറവായിരുന്നു. വെള്ളപ്പൊക്ക നിയന്ത്രണ പ്രോട്ടോക്കോൾ അനുസരിച്ച്, പരമാവധി വെള്ളം വൈഗ ഡാമിലേക്ക് തിരിച്ചുവിടാനും റൂൾ ലെവലുകളും ഗേറ്റ് ഓപ്പറേഷൻ ഷെഡ്യൂളും സൂക്ഷ്മമായി പാലിക്കാനും ഫീൽഡ് ഓഫീസർമാർക്ക് നിർദേശം നൽകിയിരുന്നുവെന്നും എം കെ സ്റ്റാലിൻ അറിയിച്ചു.

വ്യാഴാഴ്ച വൈകുന്നേരം ഏഴു മണിക്ക് അണക്കെട്ടിലെ ജലനിരപ്പ് 136 അടിയായപ്പോൾ, തമിഴ്നാട് ഫീൽഡ് ഓഫീസർമാർ 7.40 ന് തന്നെ കേരളത്തിലെ അധികൃതരെ വിവരം അറിയിച്ചു. നീരൊഴുക്ക് വർധിക്കാൻ സാധ്യതയുള്ളതിനാൽ വെള്ളിയാഴ്ച സ്പിൽവേ ഗേറ്റുകൾ തുറക്കാനുള്ള സാധ്യതയെക്കുറിച്ച് ആരാഞ്ഞു. ഈ വിവരം ഇടുക്കി ജില്ലാ കളക്ടറെയും ബന്ധപ്പെട്ട മറ്റ് ഉദ്യോഗസ്ഥരെയും അറിയിച്ചിരുന്നു. വെള്ളിയാഴ്ച ഉച്ചയ്ക്ക് ഒരു മണിയോടെയാണ് സ്പിൽവേ ഷട്ടറുകൾ തുറന്നത്. തിങ്കളാഴ്ച രാവിലെ ഏഴുമണി വരെയുള്ള അണക്കെട്ടിലെ ജലനിരപ്പ് 138.85 അടിയാണ്. ശരാശരി നീരൊഴുക്ക് 6942 ക്യുസെക്‌സ് ആണ്. സ്പിൽവേ വഴി ഒഴുക്കിവിടുന്നത് 5000 ക്യുസെക്‌സ് ജലമാണ്. റൂൾ കർവ് പൂർണമായി അനുസരിച്ചാണ് ഇത് ചെയ്യുന്നതെന്നും എം കെ സ്റ്റാലിൻ അറിയിച്ചു. അണക്കെട്ടിന് സമീപം താമസിക്കുന്ന കേരളത്തിലെ ജനങ്ങളുടെ സുരക്ഷ തമിഴ്‌നാട് സർക്കാർ ഉറപ്പാക്കുമെന്നും അദ്ദേഹം കൂട്ടിച്ചേർത്തു.