കഞ്ചാവിന്റെ ഔഷധ ഗുണം; ഐക്യരാഷ്ട്രസഭ അംഗീകാരം നൽകാൻ കാരണമെന്ത്?

കഞ്ചാവിനെ ഗുരുതരമായ ലഹരിമരുന്നുകളുടെ പട്ടികയിൽപെടുത്തിയ 1961 ലെ തീരുമാനം ശാസ്ത്രീയ അടിത്തറയില്ലാത്തതും കൊളോണിയൽ, വംശീയ മുൻവിധികളുടെ അടിസ്ഥാനത്തിലായിരുന്നുവെന്നും ഇന്റർനാഷ്ണൽ ഡ്രഗ് പോളിസി കൺസോർഷ്യം എക്സിക്യൂട്ടീവ് ഡയറക്ടർ അന്ന ഫോർദം പറഞ്ഞു. ഈ തീരുമാനമെടുത്ത ശേഷം അനേകായിരങ്ങളെ ക്രിമിനലുകളായി കണ്ട് ജയിലുകളിൽ അടച്ചുവെന്നും അന്ന പറഞ്ഞു.

അമ്പതോളം രാജ്യങ്ങളാണ് നിലവിൽ ലോകത്ത് ചികിത്സയ്ക്കായി കഞ്ചാവ് ഉപയോഗിക്കുന്നത്. കാനഡ, ഉറുഗ്വേ രാജ്യങ്ങളിലും അമേരിക്കയിലെ 15 സംസ്ഥാനങ്ങളിലും കഞ്ചാവ് ഉപയോഗിക്കാൻ അനുമതിയുണ്ട്. മെക്സിക്കോയും ലക്സംബർഗും കഞ്ചാവ് ഉപയോഗത്തിന് അനുമതി നൽകാനൊരുങ്ങുകയാണ്.

1985 വരെ കഞ്ചാവിന്റെ ഉപയോഗം ഇന്ത്യയിൽ നിയമപരമായി നിരോധിക്കപ്പെട്ടിരുന്നില്ല. എന്നാൽ 1961 മുതൽ അമേരിക്കൻ ഐക്യനാടുകളിൽ മയക്കുമുരുന്ന് നിറോധനത്തിനായുള്ള മുറവിളി ഉയർന്നുതുടങ്ങിയിരുന്നു. ഇന്ത്യയുടെ സാംസ്കാരിക ചരിത്രത്തിൽ കഞ്ചാവിന് പ്രാധാന്യം ഉണ്ടായിരുന്നതിനാൽ കഞ്ചാവ് ഉപയോഗിക്കുന്നതിന് ഇന്ത്യയിൽ നിയന്ത്രണങ്ങൾ ഇല്ലായിരുന്നു.

കാലഹരണപ്പെട്ട ലഹരി നിയമങ്ങൾ മാറ്റേണ്ടതുണ്ടെന്ന് ബ്രിട്ടനിലെ ട്രാൻസ്ഫോം ഡ്രഗ് പോളിസി ഫൗണ്ടേഷൻ അംഗം സ്റ്റീവ് റോൾസ് പറഞ്ഞു. പുതിയ തീരുമാനം ഒരു നാഴികക്കല്ലാണെന്ന് കനേഡിയൻ കഞ്ചാവ് ഉത്പാദന കമ്പനിയായ കനോപ്പി ഗ്രോത്തിന്റെ വൈസ് പ്രസിഡന്റ് ഡെറിക് വ്യക്തമാക്കി. കൂടുതൽ രോഗികൾക്ക് ചികിത്സ ഒരുക്കുന്നതിന് ഇത് സഹായിക്കുമെന്നാണ് അദ്ദേഹം പറയുന്നത്.

1800 കളിൽ നെഞ്ചുവേദന, ഗൊണേറിയ തുടങ്ങിയ രോഗങ്ങൾക്ക് മരുന്നായി ഇത് നൽകിയിരുന്നു. വിശപ്പ് വർദ്ധിക്കുന്നതിനും ലൈംഗിക പ്രശ്നങ്ങൾക്കുള്ള പരിഹാരമായും കഞ്ചാവ് നിർദ്ദേശിക്കപ്പെട്ടിരുന്നു. ഇരുപതാം നൂറ്റാണ്ടിൽ മറ്റു മരുന്നുകൾ ലഭ്യമായി തുടങ്ങിയതിനെത്തുടർന്നാണ് കഞ്ചാവ് ഔഷധാവശ്യങ്ങൾക്കായുള്ള കഞ്ചാവ് ഉപയോഗം കുറഞ്ഞുവന്നത്.

കഞ്ചാവിൽ നിന്നുൽപാദിപ്പിക്കുന്ന ടെട്രാ ഹൈഡ്രോ കനാബിനോൾ, കനാബിനോയ്ഡ് എന്നീ ഗുളികകൾ 1985 മുതൽ അമേരിക്കൻ വിപണിയിലുണ്ട്. കീമോതെറാപ്പിയെത്തുടർന്നുള്ള ഓക്കാനം ഛർദ്ദി എന്നിവയ്ക്കുള്ള പരിഹാരമാണ് ഈ മരുന്ന്. എയ്ഡ്സ് രോഹികളിലുള്ള വിശപ്പില്ലായ്മയ്ക്കും ഈ മരുന്ന് ഉപയോഗിക്കുന്നുണ്ട്.