അഭിനയ മോഹികൾക്കൊരു സുവർണ്ണാവസരം തുറന്നിട്ട് കുഞ്ഞിക്ക
Kunjika opens up a golden opportunity for acting aspirants
‘പ്രതി പൂവന്‍കോഴി’യ്ക്ക് ശേഷം റോഷന്‍ ആന്‍ഡ്രൂസ് സംവിധാനം ചെയ്യുന്ന പുതിയ ചിത്രത്തിൽ ദുല്‍ഖര്‍ സല്‍മാൻ നായകനാകുന്നു. സിനിമയുടെ ചിത്രീകരണം അടുത്ത വര്‍ഷം ജനുവരിയോടെ തുടങ്ങാനാണ് വിഭാവനം ചെയ്യുന്നത്. ദുല്‍ഖര്‍ സല്‍മാൻ്റെ വേഫെയറര്‍ ഫിലിംസിന്‍റെ ബാനറിലാണ് ചിത്രം നിര്‍മ്മിക്കുന്നത്. ബോബി-സഞ്ജയ് ആണ് ചിത്രത്തിന്‍റെ രചന നിര്‍വ്വഹിക്കുന്നത്. ഇതൊരു ത്രില്ലര്‍ ഗണത്തില്‍ പെടുന്ന സിനിമയായിട്ടാണ് ഒരുക്കുന്നതെന്ന് റോഷന്‍ ആന്‍ഡ്രൂസ് നേരത്തെ അറിയിച്ചിരുന്നു.
അതേസമയം ചിത്രത്തിനു വേണ്ടി പുതുമുഖ അഭിനേതാക്കളെ തേടുകയാണ് അണിയറപ്രവർത്തകരും. ദുല്‍ഖര്‍ സൽമാൻ തന്നെയാണ് ഈ വിവരം സോഷ്യൽ മീഡിയയിലൂടെ അറിയിച്ചിരിക്കുന്നത്. 15നും 70നും ഇടയില്‍ പ്രായമുള്ള സ്ത്രീകള്‍ക്കും പുരുഷന്മാര്‍ക്കും സിനിമയുടെ ഓഡീഷനായി അപേക്ഷിക്കാനാകും. ഷോര്‍ട്ട് ലിസ്റ്റിലൂടെ ഓഡിഷനിലൂടെ തെരഞ്ഞെടുക്കപ്പെടുന്നവര്‍ക്കായി അഭിനയക്യാമ്പ് സംഘടിപ്പിക്കുന്നുണ്ട്. ഡിസംബര്‍ ആദ്യത്തോടെയാണ് ഒരു അഭിനയക്യാമ്പ് സംഘടിപ്പിക്കുന്നത്. വേഫെയറർ അഭിനയത്തിൽ അഗ്രഗണ്യരായ നവാഗതരെ സിനിമയ്ക്ക് പരിചയപ്പെടുത്തുക കൂടിയാണ് എന്ന് ദുല്‍ഖര്‍ അറിയിപ്പ് പോസ്റ്റർ പങ്കുവെച്ചു കൊണ്ട് കുറിച്ചിട്ടുണ്ട്.
മലയാളത്തിൽ ദുൽഖർ പ്രധാന നായകനായെത്തിയ അവസാന ചിത്രം ‘ഒരു യമണ്ടന്‍ പ്രേമകഥ’യാണ്. വേഫെയറർ ഫിലിംസ് നിർമ്മിച്ച ‘വരനെ ആവശ്യമുണ്ട്’ എന്ന ചിത്രത്തിലും ദുൽഖറുണ്ടായിരുന്നു, സുരേഷ് ഗോപിയായിരുന്നു ചിത്രത്തിലെ നായകതുല്യ പ്രാധാന്യമുള്ള വേഷം കൈകാര്യം ചെയ്തിരുന്നത്. അനൂപ് സത്യനാണ് ചിത്രം സംവിധാനം ചെയ്തത്. വേഫെറർ തന്നെ നിര്‍മ്മിച്ച ചിത്രം ‘മണിയറയിലെ അശോകനി’ലും ദുൽഖർ അതിഥി വേഷത്തിൽ പ്രത്യക്ഷപ്പെട്ടിരുന്നു. മലയാള സിനിമ ‘കുറുപ്പ്’, തമിഴ് ചിത്രങ്ങളായ ‘വാന്‍’, ‘ഹെയ് സിനാമിക’ എന്നിവയാണ് ദുല്‍ഖറിന്‍റേതായി അണിയറയിലൊരുങ്ങുന്ന സിനിമകൾ.
