‘റീബിൽഡ് കേരള നിശ്ചലം, സർക്കാർ ഒന്നും പഠിച്ചില്ല’ വിമർശനവുമായി കെ സുരേന്ദ്രൻ
K Surendran criticizes 'Rebuild Kerala stagnation, government has not learned anything'
തിരുവനന്തപുരം: സർക്കാരിന്റെ സ്വപ്ന പദ്ധതിയായ റീബിൽഡ് കേരള പൂർണ്ണമായും നിശ്ചലമായതായി ബിജെപി സംസ്ഥാന അധ്യക്ഷൻ കെ സുരേന്ദ്രൻ. പുനർ നിർമ്മാണത്തിനായി പിരിച്ച തുകയുടെ പകുതി പോലും സർക്കാർ ചെലവഴിച്ചിട്ടില്ലെന്ന് സുരേന്ദ്രൻ ആരോപിച്ചു. കോട്ടയം ജില്ലയിലെ ദുരിതബാധിത പ്രദേശങ്ങൾ സന്ദർശിക്കവെയായിരുന്നു സുരേന്ദ്രന്റെ പ്രതികരണം.
വീടുകളിൽ ചെളിയും കല്ലും നിറഞ്ഞിട്ടും അവിടങ്ങളിൽ സന്നദ്ധ പ്രവ‍ര്‍ത്തക‍ര്‍ മാത്രമാണുള്ളത്. സ‍ര്‍ക്കാര്‍ സംവിധാനങ്ങൾ എവിടെയുമില്ല. എല്ലാവ‍ര്‍ക്കും അടിയന്തര സഹായം നൽകണം. മരണപ്പെട്ടവ‍ര്‍ക്ക് ധനസഹായം നൽകുന്നതുപോലെ വീട് നഷ്ടപ്പെട്ടവരെ സഹായിക്കാനുമുള്ള ബാധ്യത സ‍ര്‍ക്കാരിനുണ്ട്. കേന്ദ്രസര്‍ക്കാ‍ര്‍ കൈ അയച്ച് സഹായിച്ചിട്ടും സ‍ര്‍ക്കാരിന്റെ അലംഭാവം മൂലം ജനങ്ങൾക്ക് സഹായം ലഭിച്ചില്ലെന്ന് സുരേന്ദ്രൻ ആരോപിച്ചു.
മുൻ പ്രളയങ്ങളിൽ ജനങ്ങൾക്കുണ്ടായ നഷ്ടം നികത്താൻ സർക്കാർ തയ്യാറായില്ല. നേരത്തെ നടന്ന ദുരന്തങ്ങളിൽ നിന്നും സർക്കാർ ഒന്നും പഠിച്ചില്ലെന്ന് വ്യക്തമാക്കുന്നതാണ് ഇപ്പോഴത്തെ ദുരന്തം. ദുരിതാശ്വാസ പ്രവർത്തനങ്ങൾ വേണ്ടത്ര ഗൗരവത്തോടെ മുന്നോട്ടു കൊണ്ടുപോകുന്നില്ലെന്നും സുരേന്ദ്രൻ കുറ്റപ്പെടുത്തി.
അതേസമയം സംസ്ഥാന സര്‍ക്കാരിനെ കുറ്റപ്പെടുത്തി ഇടത് സഹയാത്രികൻ ചെറിയാൻ ഫിലിപ്പ് രംഗത്തെത്തിയിരുന്നു. 2018,19 എന്നീ വർഷങ്ങളിലെ പ്രളയത്തിൽ നിന്നും ഒട്ടേറെ പാഠങ്ങൾ നാം പഠിച്ചതാണ്. നെതർലണ്ട് മാതൃകയെക്കുറിച്ച് അവിടെ പോയി പഠിച്ചു. തുടർ നടപടിയെക്കുറിച്ച് ഇപ്പോഴും ആർക്കുമറിയില്ല- ചെറിയാൻ ഫിലിപ്പ് പറഞ്ഞു.
ഭരണാധികാരികൾ ദുരന്തനിവാരണത്തിന് വേണ്ടത്ര ശ്രദ്ധിക്കാതെ ദുരന്തം വന്നതിനു ശേഷം ദുരിതാശ്വാസ ക്യാമ്പിൽ കണ്ണീർ പൊഴിക്കുകയും വിലാപകാവ്യം രചിക്കുകയും ചെയ്യുന്നത് ജനവഞ്ചനയാണെന്നും അദ്ദേഹം പറഞ്ഞു.
കാലാവസ്ഥാ വ്യതിയാനം, പരിസ്ഥിതി ആഘാതം എന്നിവ മൂലം കേരളത്തിൽ എപ്പോൾ വേണമെങ്കിലും പ്രളയവും വരൾച്ചയും പ്രതീക്ഷിക്കാം. ഭൂമിയിൽ മഴവെള്ളം കെട്ടിക്കിടക്കാൻ ഇടമുണ്ടായാൽ മാത്രമേ പ്രളയത്തേയും വരൾച്ചയേയും പ്രതിരോധിക്കാനാവൂ. രണ്ടിനേയും നേരിടാൻ ദീർഘകാല പദ്ധതികൾ സർക്കാർ ആവിഷ്ക്കരിക്കണം- ചെറിയാൻ ഫിലിപ്പ് വ്യക്തമാക്കി.
