ഉപരോധം ഏര്‍പ്പെടുത്തിയത് ഖത്തറിനെതിരെ; പക്ഷെ നേട്ടം കൊയ്തത് ഖത്തര്‍
Imposes sanctions on Qatar; But Qatar reaped the benefits
2017 ജൂണില്‍ സൗദി അറേബ്യ, യുഎഇ, ബഹ്‌റൈന്‍, ഈജിപ്ത് എന്നീ നാല് അറബ് രാജ്യങ്ങള്‍ ചേര്‍ന്ന് ഖത്തറിനെതിരെ വ്യാപാര-ഗതാഗത-നയതന്ത്ര ഉപരോധം പിന്‍വലിക്കുന്നതായി ഉപരോധ രാഷ്ട്രങ്ങള്‍ പ്രഖ്യാപിച്ചുകഴിഞ്ഞു. റിയാദില്‍ ചേര്‍ന്ന ജിസിസി ഉച്ചകോടിയിമാണ് ഇതുമായി ബന്ധപ്പെട്ട തീരുമാനമുണ്ടായത്. ജിസിസി ഉച്ചകോടിയുടെ മുന്നോടിയായി സൗദി അറേബ്യ ഖത്തറുമായുള്ള തങ്ങളുടെ അതിര്‍ത്തികള്‍ തുറന്നതിലൂടെ ഉപരോധം അവസാനിക്കുന്നതിന്റെ വ്യക്തമായ സൂചനകള്‍ ഞായറാഴ്ച തന്നെ നല്‍കിയിരുന്നു.
ഉപരോധത്തിലും തലയുയര്‍ത്തി ഖത്തര്‍
Photo Credit:QNA
എന്നാല്‍ മൂന്നര വര്‍ഷത്തിനു ശേഷം ഉപരോധം അവസാനിക്കുമ്പോള്‍ ഇതിലൂടെ ഏറ്റവും കൂടുതല്‍ നേട്ടമുണ്ടാക്കിയ രാജ്യം ഖത്തറാണെന്നാണ് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്യുന്നത്. അയല്‍ രാജ്യങ്ങളേര്‍പ്പെടുത്തിയ ഉപരോധത്തില്‍ തളര്‍ന്നു പോവുമെന്ന് പ്രതീക്ഷിച്ച ഖത്തര്‍, ആ വെല്ലുവിളിയെ വിജയകരമായി നേരിട്ടുവെന്നാണ് അനുഭവങ്ങള്‍ തെളിയിക്കുന്നത്. കുവൈത്തിന്റെ മധ്യസ്ഥതയില്‍ നടന്ന സമവായ ചര്‍ച്ചകള്‍ക്കൊടുവില്‍ സൗദി അറേബ്യ അതിര്‍ത്തികള്‍ തുറന്നെങ്കിലും ഉപരോധം പിന്‍വലിക്കുന്നതിന് മുന്നോട്ടുവച്ച 13 നിബന്ധനകളില്‍ ഒന്നു പോലും ഖത്തര്‍ അംഗീകരിച്ചിട്ടില്ലെന്നാണ് റിപ്പോര്‍ട്ട്.
ഖത്തറിനെ ആക്രമിക്കാന്‍ പദ്ധതിയിട്ടു?
Photo Credit: QNA
ഖത്തര്‍ ഉപരോധത്തിനു മുന്നോടിയായി സൗദിയും യുഎഇയും ചേര്‍ന്ന് ഖത്തറിനെ സൈനികമായി കീഴ്‌പ്പെടുത്താന്‍ പദ്ധതിയിട്ടിരുന്നതായും അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തിരുന്നു. എന്നാല്‍ അന്ന് യുഎസ് വിദേശകാര്യ സെക്രട്ടറിയായിരുന്ന റെക്‌സ് ടില്ലേഴ്‌സന്റെ ശക്തമായ സമ്മര്‍ദ്ദത്തിനൊടുവിലാണ് പദ്ധതി ഉപേക്ഷിക്കാന്‍ ഇരുരാജ്യങ്ങളും തയ്യാറായതെന്നാണ് റിപ്പോര്‍ട്ട്. തുര്‍ക്കി സൈന്യം നല്‍കിയ പിന്തുണയും സഹായകമായി. അല്ലാതിരുന്നെങ്കില്‍ 1990ല്‍ സദ്ദാം ഹുസൈന്റെ ആക്രമണത്തിനു മുന്നില്‍ കുവൈത്തിന് സംഭവിച്ചതു പോലുള്ള പരാജയം ശക്തമായ സൗദി-യുഎഇ സൈന്യത്തിനു മുമ്പില്‍ ഖത്തറും നേരിടേണ്ടി വന്നേനെ. എന്നാല്‍ ആക്രമണ ശ്രമം പരാജയപ്പെട്ടതിനെ തുടര്‍ന്നാണ് സാമ്പത്തികമായി ഖത്തറിനെ തളര്‍ത്തുന്നതിനായി ഉപരോധം പ്രഖ്യാപിച്ചത്.
ഉപരോധ രാഷ്ട്രങ്ങളുടെ ശ്രമം വിജയിച്ചില്ല
Photo Credit: QNA
ഭക്ഷ്യ സാധനങ്ങള്‍ക്കുള്‍പ്പെടെ സൗദിയെയും യുഎഇയെയും അമിതമായി ആശ്രയിച്ചിരുന്ന ഖത്തറിനെ ഉപരോധം പെട്ടെന്ന് തളര്‍ത്തുമെന്നായിരുന്നു ഉപരോധ രാഷ്ട്രങ്ങളുടെ കണക്കുകൂട്ടല്‍. എന്നാല്‍ അതുണ്ടായില്ല. പകരം ഉപരോധ രാജ്യങ്ങളുമായി ശത്രുതയിലുള്ള ഇറാന്റെയും തുര്‍ക്കിയുടെയും അകമഴിഞ്ഞ പിന്തുണ ഇക്കാര്യത്തില്‍ ഖത്തറിന് ലഭിച്ചു. ഭക്ഷ്യ ഉല്‍പ്പന്നങ്ങള്‍ ഉള്‍പ്പെടെയുള്ളവ വന്‍ തോതില്‍ ഖത്തറിലേക്ക് അയക്കാന്‍ ഇരുരാജ്യങ്ങളും തയ്യാറായതോടെ പ്രതിസന്ധിക്ക് താല്‍ക്കാലിക വിരാമമായി. എന്നാല്‍ ഭക്ഷ്യോല്‍പ്പാദനത്തില്‍ സ്വയം പര്യാപ്ത നേടാനുള്ള ശ്രമങ്ങള്‍ ഖത്തര്‍ അതോടെ ആരംഭിക്കുകയും ചെയ്തു. പഴം, പച്ചക്കറി തുടങ്ങിയവയുടെ കൃഷി വന്‍തോതില്‍ ആരംഭിക്കുകയും ക്ഷീരവികസന രംഗത്ത് വലിയ കുതിച്ചുചാട്ടം തന്നെ ഖത്തര്‍ കൈവരിക്കുകയും ചെയ്തു. ഇപ്പോള്‍ അയല്‍ രാജ്യങ്ങളിലേക്ക് പല ഉല്‍പ്പന്നങ്ങളും കയറ്റി അയക്കുന്ന രീതിയിലേക്ക് വളര്‍ന്നിരിക്കുകയാണ് ഖത്തര്‍.
ഖത്തര്‍ സൈനികമായി കരുത്തു നേടി
Photo Credit: QNA
നേരത്തേ നാമമാത്രമായ സൈനിക ശക്തിയായിരുന്ന ഖത്തര്‍, ഉപരോധം അവസാനിക്കുന്നതോടെ മേഖലയിലെ മറ്റേത് രാജ്യങ്ങളെയും വെല്ലാനുള്ള സൈനിക കരുത്ത് കൈവരിച്ചുകഴിഞ്ഞു. ഇത്തവണത്തെ ഖത്തര്‍ ദേശീയ ദിനാഘോഷം രാജ്യത്തിന്റെ സൈനിക ശക്തിയുടെ കരുത്ത് വിളിച്ചോതുന്നതായിരുന്നു. ഫ്രാന്‍സില്‍ നിന്നു വാങ്ങിയ ഏറ്റവും പുതിയ ഡസ്സോള്‍ട്ട് റാഫേല്‍ ഫൈറ്റര്‍ ജെറ്റുകള്‍, സി-17, സി-31 തുടങ്ങിയ ട്രാന്‍സ്‌പോര്‍ട്ട് വിമാനങ്ങള്‍, എഎച്ച് 64 അപ്പാഷെ ഹെലിക്കോപ്റ്റര്‍ ഗണ്‍ഷിപ്പുകള്‍ തുടങ്ങിയവയുടെ പരേഡിലെ പ്രകടനം വിസ്മയകരമായിരുന്നു. ഇതിനു പുറമെ ഖത്തറിന്റെ ആവനാഴിയിലുള്ള ആയുധങ്ങള്‍ മേഖലയിലെ മറ്റേത് രാജ്യങ്ങളെയും കടത്തിവെട്ടുന്നതാണെന്നാണ് റിപ്പോര്‍ട്ട്. ജര്‍മനിയില്‍ നിന്നു വാങ്ങിയ ലെപ്പേര്‍ഡ് 2എ7 യുദ്ധ ടാങ്കുകള്‍ പോലുള്ള യുദ്ധ സന്നാഹങ്ങള്‍ കരയുദ്ധത്തിലും ഖത്തറിന് മേല്‍ക്കൈ നല്‍കുമെന്നാണ് വിലയിരുത്തപ്പെടുന്നത്.
ഉപരോധം പ്രഖ്യാപിച്ചവര്‍ തന്നെ പിന്‍വലിക്കുന്നു
Photo Credit: QNA
ഖത്തറിനെതിരേ 2017ല്‍ ഉപരോധം പ്രഖ്യാപിക്കാന്‍ നേതൃത്വം നല്‍കിയ സൗദി തന്നെയാണ് ഖത്തര്‍ അതിര്‍ത്തികള്‍ നിരുപാധികം തുറന്നുകൊടുത്തു കൊണ്ട് അത് പിന്‍വലിക്കുന്നതായി പ്രഖ്യാപിച്ചത്. ഇറാനുമായുള്ള ബന്ധം വിച്ഛേദിക്കുക, അല്‍ ജസീറ അടച്ചുപൂട്ടുക, മുസ്ലിം ബ്രദര്‍ഹുഡിനുള്ള പിന്തുണ അവസാനിപ്പിക്കുക തുടങ്ങി ഉപരോധ രാഷ്ട്രങ്ങള്‍ മുന്നോട്ടുവച്ച 13 നിബന്ധനകളില്‍ ഒന്നുപോലും അംഗീകരിക്കാന്‍ ഖത്തര്‍ തയ്യാറായിട്ടില്ലെന്നിരിക്കെയാണ് സൗദി അതിര്‍ത്തികള്‍ തുറന്നത്. അതിര്‍ത്തികള്‍ തുറക്കാതെ ജിസിസി ഉച്ചകോടിയില്‍ അമീര്‍ പങ്കെടുക്കില്ലെന്ന ഖത്തറിന്റെ നിലപാട് അംഗീകരിക്കപ്പെടുകയായിരുന്നുവെന്നാണ് വിലയിരുത്തപ്പെടുന്നത്. ഏത് പ്രതിസന്ധി ഘട്ടത്തെയും അതിജീവിക്കാനുള്ള കരുത്ത് കൈവരിക്കാന്‍ ഖത്തറിനെ പ്രാപ്തമാക്കിയെന്നതാണ് ഉപരോധം കൊണ്ടുണ്ടായ പ്രധാന നേട്ടം.
