എല്ലാവർക്കും കൊവിഡ് വാക്‌സിൻ സൗജന്യം; പ്രഖ്യാപനവുമായി മുഖ്യമന്ത്രി

കൊവിഡ് അവലോകന യോഗത്തിന് ശേഷം നടന്ന പത്രസമ്മേളനത്തിലാണ് മുഖ്യമന്ത്രി പ്രഖ്യാപനം നടത്തിയത്. മരണനിരക്കിൽ കുറച്ച് വർധനയുണ്ടെങ്കിലും പുതിയ കൊവിഡ് കേസുകളുടെ എണ്ണത്തിൽ കുറവ് തുടരുകയാണ്. ഏകദേശം മുപ്പതോളം മരണം ഒരു ദിവസം റിപ്പോർട്ട് ചെയ്യുന്നുണ്ട്. ടെസ്‌റ്റ് പോസിറ്റിവിറ്റി നിരക്ക് കഴിഞ്ഞ ദിവസങ്ങളിൽ പത്തിൽ താഴേക്ക് വന്നത് ആശ്വസകരമാണ്. തദ്ദേശ തെരഞ്ഞെടുപ്പ് രോഗവ്യാപനത്തിന് ഇടയാക്കില്ലെങ്കിൽ ഈ സാഹചര്യം തുടരുമെന്നും മുഖ്യമന്ത്രി പറഞ്ഞു.

കൊവിഡ് ജാഗ്രതയിൽ വീഴ്‌ച വരുത്തിയാൽ സ്ഥിതിഗതികൾ മോശമാകാം. സാധാരണ ഗതിയിൽ കൊവിഡ് ബാധിതരായതിന് ശേഷവും ചില ശാരീരിക ബുദ്ധിമുട്ടുകൾ ഇടയാക്കാമെന്നും മുഖ്യമന്ത്രി പറഞ്ഞു.

കേരളത്തിൽ ഇന്ന് 5949 പേർക്ക് കൊവിഡ്-19 സ്ഥിരീകരിച്ചു. 5268 പേർക്ക് രോഗമുക്തിയുണ്ടായപ്പോൾ മരണസംഖ്യ വർധിച്ചു. ഇന്ന് 32 മരണങ്ങൾ കൂടി സ്ഥിരീകരിച്ചതോടെ ആകെ മരണം 2594 ആയി ഉയർന്നു. കഴിഞ്ഞ 24 മണിക്കൂറിനിടെ 59,690 സാമ്പിളുകളാണ് പരിശോധിച്ചത്. വിവിധ ജില്ലകളിലായി 3,15,167 പേരാണ് ഇപ്പോൾ നിരീക്ഷണത്തിലുള്ളത്. ഇതോടെ 60,029 പേരാണ് രോഗം സ്ഥിരീകരിച്ച് ഇനി ചികിത്സയിലുള്ളത്. 6,01,861 പേർ ഇതുവരെ കൊവിഡിൽ നിന്നും മുക്തി നേടി.