കോവിഡ് വാക്‌സിന്‍ : ഖത്തറില്‍ പ്രത്യേക വെബ്‌സൈറ്റ് പ്രവര്‍ത്തനമാരംഭിച്ചു
Covid Vaccine: A special website has been launched in Qatar
ദോഹ: ഖത്തറില്‍ കൊവിഡ് പ്രതിരോധ വാക്‌സിന്‍ വിതരണം തുടങ്ങുന്നതിന് മുന്നോടിയായി പ്രത്യേക മൈക്രോ വെബ്‌സൈറ്റിന് തുടക്കം കുറിച്ച് ഖത്തര്‍. https://covid19.moph.gov.qa/EN/Covid19-Vaccine എന്ന ലിങ്ക് വഴി വെബ്‌സൈറ്റില്‍ പ്രവേശിക്കാം.
ഖത്തറില്‍ വിതരണത്തിനെത്തുന്ന ഫൈസര്‍ വാക്‌സിനെ കുറിച്ചും അതിന്റെ സവിശേഷതകളെ കുറിച്ചുമുള്ള വിവരങ്ങള്‍ വെബ്‌സൈറ്റില്‍ ലഭ്യമാണ്. വാക്‌സിന്‍ എങ്ങനെയാണ് മനുഷ്യ ശരീരത്തില്‍ പ്രവര്‍ത്തിക്കുന്നത്, കൊവിഡ് വൈറസിനെതിരേ അത് എത്രമാത്രം ഫലപ്രദമാണ് തുടങ്ങിയ കാര്യങ്ങളും ഇതിലുണ്ട്.
വാക്‌സിന്‍ വിതരണത്തിന്റെ വിവിധ ഘട്ടങ്ങള്‍, വാക്‌സിനുമായി ബന്ധപ്പെട്ട സംശയങ്ങളും അവയ്ക്കുള്ള മറുപടികളും, വാക്‌സിനെ കുറിച്ച് ആധികാരികമായ വിവരങ്ങള്‍ ലഭിക്കുന്ന വെബ്‌സൈറ്റുകള്‍ തുടങ്ങിയവയും ഇതില്‍ ഉള്‍ക്കൊള്ളിച്ചിട്ടുണ്ട്. മൂന്ന് ഘട്ടങ്ങളിലായാണ് ഖത്തറില്‍ വാക്‌സിന്‍ വിതരണം ചെയ്യുകയെന്ന് വെബ്‌സൈറ്റ് വ്യക്തമാക്കുന്നു.
ആദ്യഘട്ടത്തില്‍ വിട്ടുമാറാത്ത അസുഖങ്ങളുള്ളവര്‍, പ്രായമായവര്‍, ആരോഗ്യ പ്രവര്‍ത്തകര്‍ എന്നിവരെയാണ് ഉള്‍പ്പെടുത്തിയിരിക്കുന്നത്. 16 വയസ്സിന് താഴെയുള്ള കുട്ടികള്‍ക്ക് വാക്‌സിന്‍ വിതരണം ചെയ്യില്ലെന്നും വെബ്‌സൈറ്റിലുണ്ട്. ഇതോടൊപ്പം കൊവിഡുമായി ബന്ധപ്പെട്ട് രാജ്യത്ത് നിലനില്‍ക്കുന്ന മുഴുവന്‍ പെരുമാറ്റച്ചട്ടങ്ങളും നിയന്ത്രണങ്ങളും പ്രതിരോധ രീതികളും ഇതില്‍ ഉള്‍പ്പെടുത്തിയിട്ടുണ്ട്.
