കോടതി അലക്ഷ്യ കേസ്; സുപ്രീംകോടതി പ്രശാന്ത് ഭൂഷന് ഒരു രൂപ പിഴ വിധിച്ചു
Court negligence case; Supreme Court fines Prashant Bhushan Rs one
ന്യൂഡൽഹി: കോടതി അലക്ഷ്യ കേസിൽ മുതിർന്ന അഭിഭാഷകൻ പ്രശാന്ത് ഭൂഷന് ഒരു രൂപ പിഴ. സെപ്തംബർ 15ന് മുമ്പായി പിഴയൊടുക്കണമെന്നാണ് സുപ്രീംകോടതി ഉത്തരവിട്ടിരിക്കുന്നത്. പിഴയൊടുക്കിയില്ലെങ്കിൽ മൂന്ന് മാസം തടവ് അനുഭവിക്കണമെന്നും മൂന്ന് വർഷത്തേക്ക് ഡീബാർ ചെയ്യുമെന്നും ഉത്തരവിൽ പറയുന്നു.
സംഭവത്തിൽ മാപ്പ് പറയാൻ വിസമ്മതിക്കുകയും പ്രസ്താവനയിൽ ഉറച്ചു നിന്നതോടെയുമാണ് ജസ്റ്റിസ് അരുൺ മിശ്ര അദ്ധ്യക്ഷനായ ബെഞ്ച് ഉത്തരവ് വിധിച്ചത്. ചീഫ് ജസ്റ്റിസ് എസ്എ ബോബ്ഡെ ആഡംബര ബൈക്കിൽ ഇരിക്കുന്ന ചിത്രം പങ്കുവെച്ച് കഴിഞ്ഞ ആറ് വർഷത്തെ ചീഫ് ജസ്റ്റിസുമാരെ വിമർശിച്ചുകൊണ്ടായിരുന്നു പ്രശാന്ത് ഭൂഷന്റെ ട്വീറ്റുകൾ. പിഴയൊടുക്കാൻ തയ്യാറാകാതെ വന്നാൽ പ്രശാന്ത് ഭൂഷന് തടവ് അനുഭവിക്കേണ്ടി വരും.
താന്‍ പറഞ്ഞ പരാമര്‍ശങ്ങള്‍ തന്റെ വിശ്വാസങ്ങളെ പ്രതിനിധാനം ചെയ്യുന്നവയാണെന്നും അതിന് മാപ്പ് ചോദിക്കുന്നത് ആത്മാര്‍ത്ഥയില്ലാത്ത കാര്യമാവുമെന്നും ഭൂഷണ്‍ പറഞ്ഞു. പ്രശാന്ത് ഭൂഷണിനെ ശിക്ഷിക്കരുതെന്ന് അറ്റോര്‍ണി ജനറല്‍ കെ കെ വേണുഗോപാല്‍ ആവശ്യപ്പെട്ടിരുന്നു. പ്രശാന്ത് ഭൂഷണിനെ ജയിലിലേക്ക് അയച്ച രക്തസാക്ഷി ആക്കരുതെന്നായിരുന്നു അഭിഭാഷകന്‍ രാജീവ് ധവാന്‍ അഭിപ്രായപ്പെട്ടത്.
