‘കേന്ദ്ര ഏജൻസികളെ വിളിപ്പിച്ചത് മുഖ്യമന്ത്രി, ഇപ്പോൾ വേവലാതി’;വി മുരളീധരൻ
'CM calls central agencies, now he is worried'; V Muraleedharan
കോഴിക്കോട്: മുഖ്യമന്ത്രിയാണ് കേന്ദ്ര ഏജൻസികളെ കേരളത്തിലേക്ക് വിളിപ്പിച്ചതെന്നു കേന്ദ്ര വിദേശകാര്യ സഹമന്ത്രി വി മുരളീധരൻ. എന്നാൽ ഇപ്പോൾ ഇത് അംഗീകരിക്കാൻ മുഖ്യമന്ത്രി തയാറാകുന്നില്ല. ആദ്യം അന്വേഷിക്കട്ടെ എന്ന് പറഞ്ഞ മുഖ്യമന്ത്രി ഇപ്പോൾ എന്തിനാണ് വേവലാതിപെടുന്നതെന്നും മുരളീധരൻ ചോദിച്ചു.
കേരളത്തിലും കോൺഗ്രസിൻ്റെ പ്രതാപകാലം അസ്തമിക്കുന്നതിൻ്റെ സൂചനകൾ കണ്ടുതുടങ്ങി. കോൺഗ്രസിനെ വലിയ രീതിയിൽ പിന്തുണച്ച ക്രൈസ്തവ മേഖലയടക്കം അവരെ കൈവിടുകയാണ്. തീവ്രവാദ സംഘടനകളുമായി സഖ്യമുണ്ടാക്കാനുള്ള കോൺഗ്രസ് തീരുമാനം ക്രൈസ്തവ വിഭാഗങ്ങളിൽ ആശങ്ക ഉണ്ടാക്കി. തെരഞ്ഞെടുപ്പിനെ നേരിടാൻ തീവ്രവാദ സംഘടനകളുമായുള്ള ബന്ധം സാധാരണ കോൺഗ്രസുകാർക്ക് അംഗീകരിക്കാൻ കഴിയില്ലെന്ന് ഈ തെരഞ്ഞെടുപ്പ് ഫലം കാണിച്ച് തരും. കോൺഗ്രസിൽ നിന്ന് അധികം വൈകാതെ നിരവധി പേർ ബിജെപിയിലേക്കെത്തുമെന്നും അദ്ദേഹം പറഞ്ഞു.
കർഷക സമരം രാജ്യത്ത് എല്ലായിടത്തുമില്ല. കേരളത്തിൻ്റെ നടപടി രാഷ്ട്രീയ പ്രേരിതമാണ്. കർഷകർക്ക് നേരിട്ട് വിളകൾ വിൽക്കാനാവുന്നതാണ് പുതിയ കർഷക നിയമം. ഇത് എങ്ങനെയാണ് കർഷകർക്ക് എതിരാകുകയെന്നും മന്ത്രി ചോദിച്ചു. ധനശക്തി കൊണ്ട് മാത്രം ജനങ്ങളെ വരുതിയിൽ ഇരുത്താമെന്ന് സിപിഎം എല്ലാ കാലത്തും കരുതണ്ട. സ്വർണ കള്ളക്കടത്ത് കേസിലടക്കം അന്വേഷണം അതിൻ്റെ അവസാനത്തിലെത്തിയാലേ നിർത്തുകയുള്ളൂ. ആരാണ് ഇതിൻ്റെ പിന്നിലുള്ളതെന്ന് അന്വേഷിച്ച് വരികയാണ്. അത് കണ്ടുപിടിക്കുക തന്നെ ചെയ്യുമെന്നും അദ്ദേഹം വ്യക്തമാക്കി.
