‘കേന്ദ്രം സ്വയം തിരുത്തണം’: കര്‍ഷകര്‍ക്ക് പിന്തുണയുമായി പിണറായി
'Central government should correct itself': Pinarayi with support for farmers
തിരുവനന്തപുരം: കേന്ദ്രസര്‍ക്കാരിൻ്റെ കാര്‍ഷിക നിയമങ്ങള്‍ക്കെതിരെ ഡൽഹിയിൽ നടക്കുന്ന കര്‍ഷകസമരത്തിന് പിന്തുണയുമായി മുഖ്യമന്ത്രി പിണറായി വിജയൻ. കര്‍ഷകരെ ശത്രുക്കളായി കാണുന്ന കേന്ദ്രസര്‍ക്കാര്‍ സമീപനം അവസാനിപ്പിക്കണമെന്നും അവരുടെ ആവശ്യങ്ങള്‍ അംഗീകരിക്കണമെന്നും മുഖ്യമന്ത്രി ഫേസ്ബുക്ക് പോസ്റ്റിൽ പറഞ്ഞു. കര്‍ഷകരെ ഭയക്കുന്നത് എന്തിനാണെന്നും അവരുടെ ആവശ്യങ്ങള്‍ അംഗീകരിക്കാത്തത് എന്തുകൊണ്ടാണെന്നും മുഖ്യമന്ത്രി ചോദിച്ചു.
കാര്‍ഷിക നിയമങ്ങള്‍ പാസാക്കിയ ബിജെപി സര്‍ക്കാരിനെപ്പം കോൺഗ്രസിനെയും നിശിതമായി വിമര്‍ശിക്കുന്ന നിലപാടാണ് മുഖ്യമന്ത്രി ഫേസ്ബുക്ക് പോസ്റ്റിൽ സ്വീകരിച്ചത്. ‘ബിജെപിയും കോൺഗ്രസും ഉള്‍പ്പെട്ട വലതുപക്ഷ പാര്‍ട്ടികളുടെ കോര്‍പ്പറേറ്റ് ദാസ്യത്തിൻ്റെ ഇരകളാണ് കര്‍ഷകര്‍’ എന്ന് അദ്ദേഹം പറഞ്ഞു. രാജ്യത്തിൻ്റെ നട്ടെല്ലായ കര്‍ഷകരുടെ ആശങ്കകള്‍ പരിഹരിക്കുന്നതിനു പകരം കേന്ദ്രസര്‍ക്കാര്‍ സമരത്തെ അടിച്ചമര്‍ത്തുന്ന കാഴ്ചകളാണ് കാണുന്നതെന്നും മുഖ്യമന്ത്രി പറഞ്ഞു.
കര്‍ഷക സമരം രാജ്യത്തിൻ്റെ മൊത്തത്തിലുള്ള ‘പ്രതിഷേധ വേലിയേറ്റമായി’ മാറുകയാണെന്ന് മുഖ്യമന്ത്രി പറഞ്ഞു. ഇന്ത്യ കണ്ട ഏറ്റവും വലിയ ജനമുന്നേറ്റമായി അത് മാറുകയാണെന്നും മുഖ്യമന്ത്രി പറഞ്ഞു. ഇനിയെങ്കിലും കര്‍ഷകരെ ദാസ്യരായി കാണുന്ന സമീപനത്തിൽ നിന്ന് കേന്ദ്രസര്‍ക്കാര്‍ പിന്തിരിയണമെന്നും മുഖ്യമന്ത്രി പറഞ്ഞു.
“90കളിൽ കോൺഗ്രസിൻ്റെ കൈപിടിച്ച് നിയോലിബറൽ നയങ്ങൾ രാജ്യത്ത് അരങ്ങേറിയത് മുതൽക്കുള്ള ചരിത്രം ഈ പോരാട്ടത്തിന്റെ പിന്നിലുണ്ട്. കടം കയറി ആത്മാഹുതി ചെയ്യേണ്ടി വന്ന മൂന്നര ലക്ഷത്തിലധികം കർഷകരുടെ കണ്ണീരിലും ചോരയിലും കുതിർന്ന ചരിത്രമാണത്. അവശേഷിച്ച പ്രതീക്ഷയും കവർന്നെടുത്തപ്പോളാണ് ഇന്നവർ പ്രതിഷേധവുമായി തെരുവിലിറങ്ങിയിരിക്കുന്നത്.” മുഖ്യമന്ത്രി പറഞ്ഞു. “കാലങ്ങളായി രാജ്യം ഭരിച്ച, ഭൂരിഭാഗം സംസ്ഥാനങ്ങളും ഭരിച്ച, ബിജെപിയും കോൺഗ്രസും ഉൾപ്പെട്ട വലതുപക്ഷ പാർട്ടികളുടെ കോർപ്പറേറ്റ് ദാസ്യത്തിൻ്റെ ഇരകളാണ് കർഷകർ”, മുഖ്യമന്ത്രി ആരോപിച്ചു.
കര്‍ഷകരുടെ ആവശ്യങ്ങള്‍ അംഗീകരിച്ച് സമരം ഒത്തുതീര്‍പ്പാണമെന്നും “ക്രിയാത്മകവും ആത്മാര്‍ഥവുമായ” കൂടിയാലോചനയ്ക്ക് കേന്ദ്രം തയ്യാറാകണമെന്നും അദ്ദേഹം ആവശ്യപ്പെട്ടു. കര്‍ഷകരുടെ ശോഭനമായ ജീവിതം നാടിൻ്റെ ഭാവിയ്ക്ക് അനിവാര്യമാണെന്ന് തിരിച്ചറിയണമെന്നും കേന്ദ്രസര്‍ക്കാര്‍ സ്വയം തിരുത്താൻ തയ്യാറാകണമെന്നും മുഖ്യമന്ത്രി പറഞ്ഞു.
വിവിധ ഉത്തരേന്ത്യൻ സംസ്ഥാനങ്ങളിൽ നിന്നുള്ള കര്‍ഷക സംഘടനകള്‍ ഡൽഹിയിൽ ആറാം ദിവസവും സമരം തുടരുന്നതിനിടയിലാണ് മുഖ്യമന്ത്രിയുടെ പിന്തുണ. രാജ്യത്തെ എല്ലാ കര്‍ഷക സംഘടനകളുമായും വിഷയം ചര്‍ച്ച ചെയ്യണമെന്ന് ആവശ്യപ്പെട്ട സമരക്കാര്‍ ചര്‍ച്ചയ്ക്കുള്ള കേന്ദ്രസര്‍ക്കാരിൻ്റെ ക്ഷണം തള്ളിയിരുന്നു.
