ഏഷ്യന്‍ ഗെയിംസ്: റിയാദിനും ദോഹയ്ക്കും അവസരം; തീരുമാനം ഇന്നറിയാം
Asian Games: Opportunity for Riyadh and Doha; The decision is known today
2030ലെ ഏഷ്യന്‍ ഗെയിംസിന്റെ വേദി റിയാദോ ദോഹയോ? തീരുമാനം ഇന്നറിയാം. ഒമാന്‍ തലസ്ഥാനമായ മസ്‌ക്കറ്റില്‍ ഡിസംബര്‍ 16ന് നടക്കുന്ന ഒളിംപിക് കൗണ്‍സില്‍ ഓഫ് ഏഷ്യയുടെ 39ാമത് ജനറല്‍ അസംബ്ലി യോഗത്തിലാണ് ഇക്കാര്യത്തില്‍ അന്തിമ തീരുമാനമെടുക്കുക.
വോട്ടെടുപ്പിന് പകരം സമവായം
Photo Credit: pixabay
മല്‍സരം ദോഹയില്‍ നടത്താന്‍ ഖത്തറും റിയാദില്‍ നടത്താന്‍ സൗദിയും നേരത്തേ ബിഡ്ഡുകള്‍ സമര്‍പ്പിച്ചിരുന്നു. എന്നു മാത്രമല്ല, ഈ രണ്ടു രാഷ്ട്രങ്ങള്‍ മാത്രമാണ് ഏഷ്യയിലെ സുപ്രധാന സ്പോര്‍ട്സ് ഇവന്റുകളിലൊന്നായ ഏഷ്യന്‍ ഗെയിംസിന് ആതിഥ്യമരുളാന്‍ മല്‍സര രംഗത്തുള്ളത്. അതുകൊണ്ട് തന്നെ ജനറല്‍ അസംബ്ലി യോഗത്തില്‍ ഇക്കാര്യത്തില്‍ വോട്ടെടുപ്പിലേക്ക് പോവാതെ ഒരു സമവായ ശ്രമത്തിനാണ് ഇരു രാജ്യങ്ങളും കരുനീക്കങ്ങള്‍ നടത്തുന്നത്.
മല്‍സര വേദിയായ റിയാദും ദോഹയും?
Photo Credit: pixabay
ഏഷ്യന്‍ ഗെയിംസ് നടത്താന്‍ സര്‍വ സന്നാഹങ്ങളുമൊരുക്കി കാത്തിരിക്കുന്ന അയല്‍ രാജ്യങ്ങളെന്ന നിലയ്ക്ക് രണ്ടു പേര്‍ക്കും ഇതിന് അവസരം നല്‍കാനുള്ള ശ്രമത്തിലാണ് ഒളിംപിക് കൗണ്‍സിലെന്നാണ് പുറത്തുവരുന്ന റിപ്പോര്‍ട്ടുകള്‍. അതായത് 2030ലെ ഏഷ്യാഡ് നടത്താന്‍ ഒരു രാജ്യത്തിനും 2034ലെ മല്‍സരത്തിന് ആതിഥ്യമരുളാന്‍ മറ്റൊരു രാജ്യത്തിനും അവസരം നല്‍കാനാവുമോ എന്ന ആലോചനയിലാണ് കൗണ്‍സില്‍. ബിഇന്‍ സ്‌പോര്‍ട്ട്‌സ് ചാനലുമായി നടത്തിയ അഭിമുഖത്തില്‍ ഒളിംപിക് കൗണ്‍സില്‍ ഡയരക്ടര്‍ ഹുസൈന്‍ അല്‍ മുസല്ലം ഇതിലേക്ക് സൂചന നല്‍കുകയും ചെയ്തു.
അന്തിമ തീരുമാനം ഇന്ന്
Photo Credit: pixabay
ഏതായാലും ഇക്കാര്യത്തില്‍ അന്തിമ തീരുമാനം ഇന്നുണ്ടാകും. 2030ലെ ഏഷ്യന്‍ ഗെയിംസ് നടത്തുന്നത് അയല്‍ രാജ്യങ്ങളില്‍ ആരായിരിക്കും എന്നതായിരിക്കും ഇന്നത്തെ ജനറല്‍ അസംബ്ലിയിലെ പ്രധാന ചര്‍ച്ചാ വിഷയം. കഴിഞ്ഞ ജനുവരിയിലായിരുന്നു ഒളിംപിക് കൗണ്‍സില്‍ ഓഫ് ഏഷ്യ ഏഷ്യാഡിനുള്ള ബിഡ് ക്ഷണിച്ചത്. ഏപ്രില്‍ 22 ആയിരുന്നു സമര്‍പ്പിക്കേണ്ട അവസാന തീയതി. ഏപ്രില്‍ 23ന് താല്‍പര്യം അറിയിച്ച രാജ്യങ്ങളെ പ്രഖ്യാപിച്ചു. ഇന്ത്യ, ഫിലിപ്പീന്‍സ്, ഉസ്ബെക്കിസ്താന്‍, സൗത്ത് കൊറിയ തുടങ്ങിയ രാജ്യങ്ങളും താല്‍പര്യം പ്രകടിപ്പിച്ചിരുന്നുവെങ്കിലും പിന്നീട് പല കാരണങ്ങളാല്‍ പിന്‍മാറുകയായിരുന്നു. അവസാന തീയതിയായ ഒക്ടോബര്‍ നാലിനു മുമ്പ് ഖത്തറും ദോഹയും മാത്രമാണ് കാന്‍ഡിഡേച്ചര്‍ ഫയലുകള്‍ സമര്‍പ്പിച്ചത്.
ഒരുക്കങ്ങളില്‍ ഒളിംപിക് കൗണ്‍സിലിന് സംതൃപ്തി
Photo Credit: pixabay
ഇരു രാജ്യങ്ങളും മുന്നോട്ടുവച്ച അവകാശവാദങ്ങളെ കുറിച്ച് പരിശോധിക്കുന്നതിനും സൗകര്യങ്ങള്‍ വിലയിരുത്തുന്നതിനും ഒളിംപിക് കൗണ്‍സില്‍ ഓഫ് ഏഷ്യയുടെ ഇവാല്വേഷന്‍ കമ്മിറ്റി റിയാദും ദോഹയും സന്ദര്‍ശിച്ചിരുന്നു. ഗെയിംസ് സംഘാടനത്തിനുള്ള സംവിധാനങ്ങളുടെയും സൗകര്യങ്ങളുടെയും കാര്യത്തില്‍ ഇരു രാജ്യങ്ങളും ഒന്നിനൊന്നു മെച്ചമാണെന്ന വിലയിരുത്തലിലാണ് അധികൃതര്‍. അതുകൊണ്ടുതന്നെയാണ് ഇരു രാജ്യങ്ങള്‍ക്കും സംഘാടനത്തിന് അവസരം നല്‍കണമെന്ന ആലോചനയുമായി ജനറല്‍ അസംബ്ലി രംഗത്തെത്തിയിരിക്കുന്നത്. 21ാമത് ഏഷ്യന്‍ ഗെയിംസാണ് 2030ല്‍ നടക്കുന്നത്. അതിനു മുമ്പ് 19ാമത് ഏഷ്യാഡ് മല്‍സരം 2022 സെപ്റ്റംബര്‍ 10 മുതല്‍ 15 വരെ ചൈനയിലെ ഹാങ്സോയിലും 20ാമത് മല്‍സരം 2026ല്‍ ജപ്പാനിലെ ഐച്ചി നഗോയയിലുമാണ് നടക്കുന്നത്.
