മനസ് തുറന്ന് തിരുവനന്തപുരം മേയറാകുന്ന ആര്യ രാജേന്ദ്രൻ

പാർട്ടി ഏൽപ്പിച്ച ദൗത്യം സന്തോഷത്തോടെ ഏറ്റെടുക്കുമെന്ന് ആര്യ പറഞ്ഞു. ഔദ്യോഗിക അറിയിപ്പൊന്നും ഇതുവരെ ലഭിച്ചിട്ടില്ല. പഠനത്തിനൊപ്പം ഉത്തരവാദിത്തവും കൂടി മുന്നോട്ട് കൊണ്ട് പോകാനാണ് ആഗ്രഹം. വിദ്യാർഥികളും വിദ്യാഭ്യാസമുള്ളവരും മുന്നോട്ട് വരണമെന്നാണ് ജനങ്ങളുടെ കാഴ്‌ചപ്പാട്. പാർട്ടി പറയുന്നത് അനുസരിക്കുമെന്നും ഏഷ്യാനെറ്റ് ന്യൂസിനോട് ആര്യ പറഞ്ഞു.

തെരഞ്ഞെടുപ്പിൽ വിദ്യാർഥിനി എന്ന നിലയിലുള്ള വലിയ സ്വീകാര്യത ലഭിച്ചിരുന്നു. പഠനം മുന്നോട്ട് കൊണ്ട് പോകാൻ കഴിയുമെന്ന ഉറച്ച വിശ്വാസം തനിക്കുണ്ട്. ഓൺലൈൻ ക്ലാസുകളിൽ പങ്കെടുക്കുന്നുണ്ട്. വിദ്യാർഥികളും പഠിക്കുന്നവരും മുന്നോട്ട് വരണമെന്നത് ജനങ്ങളുടെ കാഴ്‌ചപ്പാടാണെന്നും ആൾ സെയ്ന്റ്സ് കോളേജിൽ ബിഎസ്‌സി ഗണിത ശാസ്ത്രം രണ്ടാം വര്‍ഷ വിദ്യാര്‍ഥി കൂടിയായ ആര്യ വ്യക്തമാക്കി.

മേയർ സ്ഥാനത്തേക്ക് പേരൂര്‍ക്കട വാര്‍ഡില്‍ നിന്നു ജയിച്ച ജമീല ശ്രീധരന്റെയും പിന്നാലെ വഞ്ചിയൂരില്‍ നിന്നുള്ള ഗായത്രിബാബുവിന്റെ പേരും ഉയര്‍ന്നു കേട്ടിരുന്നു. എന്നാൽ യുവ പ്രതിനിധി മേയറായി എത്തട്ടെ എന്ന തീരുമാനത്തിലാണ് ആര്യയുടെ പേര് ജില്ലാ സെക്രട്ടേറിയേറ്റ് നിര്‍ദേശിച്ചത്.

ആര്യ തിരുവനന്തപുരം മേയറാകുന്നതോടെ രാജ്യത്തെ തന്നെ ഏറ്റവും പ്രായം കുറഞ്ഞ മേയറെന്ന അപൂര്‍വ നേട്ടമാണ് ആര്യയ്ക്കും തിരുവനന്തപുരത്തിനും സ്വന്തമാകുന്നത്. നിലവിൽ ബാലസംഘത്തിന്റെ സംസ്ഥാന പ്രസിഡന്റും എസ്എഫ്ഐയുടെ സംസ്ഥാന ഭാരവാഹിയുമാണ് ആര്യ.