കേരളം ഉള്‍പ്പെടെ 6 സംസ്ഥാനങ്ങള്‍ കൊവിഡിന്റെ ‘അതിവ്യാപന സാധ്യതയുള്ള മേഖലകള്‍’
6 states including Kerala Kovid's 'Extensive Potential Areas'
മുംബൈ: കൊറോണവൈറസിന്റെ വകഭേദങ്ങള്‍ തടയുന്നതിനുള്ള ശ്രമത്തിനിടയില്‍ രാജ്യതലസ്ഥാനം ഉള്‍പ്പെടെ ആറ് സംസ്ഥാനങ്ങളെ ‘അതിവ്യാപന സാധ്യതയുള്ള മേഖലകള്‍’ ആയി പ്രഖ്യാപിച്ച് മഹാരാഷ്ട്ര. കേരളം, ഗോവ, ഗുജറാത്ത്, ഡല്‍ഹി- എന്‍സിആര്‍ മേഖല, രാജസ്ഥാന്‍, ഉത്തരാഖണ്ഡ് എന്നീ സംസ്ഥാനങ്ങളെയാണ് ‘അതിവ്യാപന സാധ്യതയുള്ള മേഖലകള്‍’ ആയി മഹാരാഷ്ട്ര ചീഫ് സെക്രട്ടറി പ്രഖ്യാപിച്ചത്.
ഉത്തരവ് പ്രകാരം, ഈ ആറ് സംസ്ഥാനങ്ങളില്‍ നിന്ന് മഹാരാഷ്ട്രയിലേക്ക് യാത്ര ചെയ്യുന്നവര്‍ക്ക് ട്രെയിന്‍ യാത്ര കഴിഞ്ഞ് 48 മണിക്കൂറിനുള്ളില്‍ ആര്‍ടി- പിസിആര്‍ പരിശോധന ആവശ്യമാണ്. മഹാരാഷ്ട്രയില്‍ കൊവിഡ് വ്യാപനം തടയുന്നതിനും മറ്റ് കൊവിഡ് വകഭേദങ്ങള്‍ സംസ്ഥാനത്തേക്ക് വരുന്നത് ചെറുക്കുന്നതിനുമാണ് ഈ തീരുമാനം. ഈ ഉത്തരവ് പുറപ്പെടുവിക്കുന്നത് മുതല്‍ പിന്‍വലിക്കുന്നതുവരെ ഈ സ്ഥലങ്ങള്‍ കൊവിഡിന്റെ അതിവ്യാപന സാധ്യതയുള്ള സ്ഥലങ്ങളായി അറിയപ്പെടും.
രാജ്യത്ത് കഴിഞ്ഞ 24 മണിക്കൂറിനിടെ 2,73,810 കൊവിഡ് കേസുകളാണ് റിപ്പോര്‍ട്ട് ചെയ്തത്. ഇതോടെ കൊവിഡ് സ്ഥിരീകരിച്ചവരുടെ എണ്ണം 1,50,61,919 ആയി ഉയര്‍ന്നു. ഞായറാഴ്ച മാത്രം 1,619 പേര്‍ മരിച്ചതോടെ ആകെ മരണസംഖ്യ 1,78,769 ആയി. അന്നേദിവസം ഡല്‍ഹിയില്‍ മാത്രം 25,462 പുതിയ കേസുകളാണ് രേഖപ്പെടുത്തിയത്. പോസിറ്റീവ് നരക്ക് 29.74 ശതമാനമാണ്.
രോഗികളുടെയും മരണങ്ങളുടെയും എണ്ണത്തില്‍ ഏറ്റവും അധികം നാശനഷ്ടമുണ്ടായ സംസ്ഥാനമായ മഹാരാഷ്ട്രയില്‍ ഞായറാഴ്ച ഏറ്റവും അധികം 68,631 പുതിയ അണുബാധകള്‍ റിപ്പോര്‍ട്ട് ചെയ്തു. 503 രോഗികള്‍ കൊവിഡ് മൂലം മരിച്ചതായും ആരോഗ്യവകുപ്പ് അറിയിച്ചു.
