അമീര്‍ കപ്പ് ഫൈനല്‍ 20,000 പേര്‍ക്ക് പ്രവേശനം; നിബന്ധനകള്‍ അറിയാം
20,000 attend Amir Cup final; Know the terms
2022ലെ ഫിഫ ലോകകപ്പ് ഫൈനലിന് കൃത്യം രണ്ടു വര്‍ഷം മുമ്പ് മറ്റൊരു ഫൈനല്‍ മല്‍സരത്തിന് വേദിയാവുകയാണ് ഖത്തറിലെ അല്‍ റയ്യാന്‍ സ്റ്റേഡിയം. ലോകകപ്പിനായി പുതുതായി നിര്‍മിച്ച സ്റ്റേഡിയത്തിലാണ് ഖത്തര്‍ ദേശീയ ദിനമായ ഡിസംബര്‍ 18ന് അമീര്‍ കപ്പ് ഫൈനല്‍ മത്സരം അരങ്ങേറുന്നത്. സ്റ്റേഡിയത്തിന്റെ ഉദ്ഘാടന മല്‍സരം കൂടിയാണ് ഈ ഫൈനല്‍.
അല്‍ റയ്യാന്‍ നാലാമത്തെ സ്റ്റേഡിയം
Photo Credit: TOI
ഫിഫ ലോകകപ്പിനായി ഖത്തറില്‍ നിര്‍മാണം പൂര്‍ത്തിയായ നാലാമത്തെ സ്റ്റേഡിയമാണ് അല്‍ റയ്യാന്‍. ഖലീഫ ഇന്റര്‍നാഷനല്‍, അല്‍ ജനൂബ്, എഡ്യുക്കേഷന്‍ സിറ്റി എന്നിവയാണ് ഇതിനകം ഉദ്ഘാടനം ചെയ്യപ്പെട്ട മറ്റ് മൂന്നു സ്റ്റേഡിയങ്ങള്‍. ലുസൈല്‍, അല്‍ ബൈത്ത്, റാസ് അബൂഅബൂദ്, അല്‍ തുമാമ എന്നീ സ്റ്റേഡിയങ്ങളുടെ നിര്‍മാണം പുരോഗമിക്കുകയാണ്. ഫിഫ ലോകകപ്പിലെ ആദ്യ മല്‍സരം അല്‍ ബൈത്ത് സ്റ്റേഡിയത്തിലും ഫൈനല്‍ മല്‍സരം ലുസൈല്‍ സ്റ്റേഡിയത്തിലുമാണ് അരങ്ങേറുക. മാള്‍ ഓഫ് ഖത്തറിന് സമീപത്താണ് അതിമനോഹരമായ മാതൃകയില്‍ അല്‍ റയ്യാന്‍ സ്റ്റേഡിയം നിര്‍മിച്ചിരിക്കുന്നത്.
അമീര്‍ കപ്പ് ഫൈനലിന് 20,000 പേര്‍
Photo Credit: twitter QNA
പുതുതായി ഉദ്ഘാടനം ചെയ്യപ്പെടുന്ന അല്‍ റയ്യാന്‍ സ്റ്റേഡിയത്തില് 40,000 കാണികളെയാണ് ഉള്‍ക്കൊള്ളാനാവുക. എന്നാല്‍ അമീര്‍ കപ്പ് ഫൈനലിന് പകുതി പേര്‍ക്ക് മാത്രമായിരിക്കും പ്രവേശനം. കൊറോണ പ്രതിരോധ നടപടികളുടെ ഭാഗമായാണ് ഈ നിയന്ത്രണം. ഇതില്‍ തന്നെ ഫൈനല്‍ മല്‍സരത്തില്‍ മാറ്റുരയ്ക്കുന്ന അല്‍ സദ്ദ്, അല്‍ അറബി ടീമുകളുടെ ക്ലബ്ബ് പ്രതിനിധികള്‍ക്കും കൊവിഡ് പ്രതിരോധ പ്രവര്‍ത്തനങ്ങളെ മുന്‍നിരയില്‍ നിന്ന് നയിച്ച ആരോഗ്യ പ്രവര്‍ത്തകര്‍ക്കും മുന്‍ഗണന നല്‍കും.
ടിക്കറ്റ് ഖത്തര്‍ ഐഡിയുമായി ബന്ധിപ്പിക്കും
Photo Credit: QNA
പ്രവേശനം ശക്തമായി നിയന്ത്രിക്കുന്നതിന്റെ ഭാഗമായി ഒരാള്‍ക്ക് ഒരു ടിക്കറ്റ് മാത്രമേ നല്‍കൂ. ഖത്തര്‍ ഐഡിയുമായി ബന്ധിപ്പിച്ചാണ് ടിക്കറ്റ് നല്‍കുക. അതുകൊണ്ടുതന്നെ ഒരാളെടുത്ത ടിക്കറ്റ് മറ്റൊരാള്‍ക്ക് കൈമാറാനാവില്ല. ഐഡി ഉടമയ്ക്ക് മാത്രമേ അതുപയോഗിച്ച് സ്റ്റേഡിയത്തില് പ്രവേശിക്കാനാകൂ. ഡിസംബര്‍ 18ന് വൈകിട്ട് ഏഴു മണിക്കാണ് ഫൈനലിലേക്ക് യോഗ്യത നേടിയ അല്‍ സദ്ദും അല്‍ അറബിയും തമ്മിലുള്ള മത്സരം. ഓരോ ആള്‍ക്കും അനുവദിക്കപ്പെട്ട സീറ്റുകളില്‍ മാത്രമേ ഇരിക്കാവൂ എന്നും അധികൃതര്‍ വ്യക്തമാക്കി.
കൊവിഡ് സര്‍ട്ടിഫിക്കറ്റ് നിര്‍ബന്ധം
Photo Credit: QNA
ഫൈനല്‍ കാണാന്‍ സ്റ്റേഡിയത്തിലേക്ക് കയറണമെങ്കില്‍ കൊവിഡ് പരിശോധനാ സര്‍ട്ടിഫിക്കറ്റ് നിര്‍ബന്ധമാണ്. ഒന്നുകില്‍ കൊവിഡ് ആന്റിബോഡി ടെസ്റ്റ് പോസിറ്റീവായതിന്റെ സര്‍ട്ടിഫിക്കറ്റ് കാണിക്കണം. കൊവിഡ് ഭേദമായവരിലാണ് ആന്റി ബോഡി ടെസ്റ്റ് പോസിറ്റീവാകുക. അല്ലെങ്കില്‍ കൊവിഡ് ടെസ്റ്റ് നടത്തിയ ശേഷം ലഭിക്കുന്ന കൊവിഡ് നെഗറ്റീവ് സര്‍ട്ടിഫിക്കറ്റ് വേണം. ഇത് രണ്ടുമില്ലാത്ത ഒരാളെയും സ്റ്റേഡിയത്തില് പ്രവേശിപ്പിക്കില്ലെന്ന് ഖത്തര്‍ ഫുട്‌ബോള്‍ അസോസിയേഷന്‍ മാര്‍ക്കറ്റിംഗ് ആന്റ് കമ്മ്യൂണിക്കേഷന്‍ ഡയരക്ടര്‍ ഖാലിദ് അല്‍ കുവാരി പറഞ്ഞു.
കൊവിഡ് പെരുമാറ്റച്ചട്ടം ബാധകം
Photo Credit: twitter
സാമൂഹ്യ അകലം പാലിക്കല്‍, കൈകള്‍ സാനിറ്റൈസര്‍ ഉപയോഗിച്ച് അണുവിമുക്തമാക്കല്‍, മാസ്‌ക്ക് ധരിക്കല്‍, ഇഹ്തിറാസ് ആപ്പില്‍ സ്റ്റാറ്റസ് പച്ചയായിരിക്കല്‍ തുടങ്ങി രാജ്യത്ത് നിലനില്‍ക്കുന്ന കൊവിഡ് പെരുമാറ്റച്ചട്ടങ്ങള്‍ പൂര്‍ണമായി സ്റ്റേഡിയത്തിനകത്തും പുറത്തും പാലിക്കല്‍ നിര്‍ബന്ധമാണ്. ഫാന്‍ സോണിലും പൊതുഗതാഗത സംവിധാനങ്ങളിലും ഈ നിബന്ധനകള്‍ ബാധകമാണ്. ഫാന്‍ സോണ്‍ മല്‍സരത്തിന് മുമ്പ് വൈകിട്ട് നാലു മണി മുതല്‍ ആറു മണി വരെയും മല്‍സര ശേഷം രാത്രി ഒന്‍പത് മണിക്കും തുറക്കും. കൂടുതല്‍ വിവരങ്ങള്‍ tickets.qfa.qaല്‍ ലഭിക്കും.
