ദുബായ് അറേബ്യന്‍ റാഞ്ചസിലെ ജുമൈറ ഇംഗ്ലീഷ് സ്‌കൂളിലെ പത്താം ക്ലാസ് വിദ്യാര്‍ഥിയാണ് ഇന്ത്യക്കാരനായ ആദി വര്‍മ. ദുബായിലെ പുതിയ താരം കൂടിയാണ് ഈ 14കാരനിപ്പോള്‍. 10 മാസം കൊണ്ട് 5000 ദിര്‍ഹം 165,000 ദിര്‍ഹമാക്കി മാറ്റിയെന്നതാണ് ആദിയെ താരപദവിയിലേക്കുയര്‍ത്തിയത്.
കളി സ്റ്റോക്ക് മാര്‍ക്കറ്റില്‍
ആദിക്ക് ലോട്ടറി അടിച്ചതാണെന്ന് കരുതിയാല്‍ തെറ്റി. അക്ഷരാര്‍ഥത്തില്‍ ഊണും ഉറക്കവുമൊഴിച്ച് സമ്പാദിച്ചതാണ് ഈ തുക. ആദ്യം കൗതുകത്തിനാണ് സ്റ്റോക്ക് മാര്‍ക്കറ്റില്‍ കളി തുടങ്ങിയതെങ്കിലും പിന്നീടത് കാര്യമാവുകയായിരുന്നു. ചെറിയ തുകയുടെ നിക്ഷേപം ക്രമേണ വലുതായി വളര്‍ന്നു. കഴിഞ്ഞ മാര്‍ച്ചില്‍ കൊവിഡിന്റെ വരവിനെ തുടര്‍ന്ന് സ്റ്റോക്ക് മാര്‍ക്കറ്റിലുണ്ടായ തകര്‍ച്ചയില്‍ നിന്നാണ് ആദിയുടെ വളര്‍ച്ച തുടങ്ങുന്നത്. അവസരം മുതലാക്കി കുറഞ്ഞ വിലയില്‍ ഓഹരികള്‍ വാങ്ങിക്കൂട്ടിയ പയ്യന്‍ പിന്നീടവ വന്‍ തുകയ്ക്ക് വില്‍ക്കുകയായിരുന്നു. യുഎസ്, ചൈന എന്നിവിടങ്ങളിലുള്‍പ്പെടെയുള്ള ഓഹരി വിപണിയില്‍ 165,000 ദിര്‍ഹം മൂല്യമുള്ള ഓഹരികളുടെ ഉമയായ ആദിക്ക് ക്രിപ്‌റ്റോകറന്‍സിയിലും നിക്ഷേപമുണ്ട്.
നാലു മണിക്ക് ഉറക്കമുണരും
മാസങ്ങളായി ആദി ഉറക്കമുണരുന്നത് രാവിലെ നാലു മണിക്കാണ്. യുഎസ്സിലെ ഓഹരി വിപണി ക്ലോസിംഗിനെ കുറിച്ച് മനസ്സിലാക്കുന്നതിനു വേണ്ടിയാണിത്. അതിനനുസരിച്ചാണ് തന്റെ ഓഹരി വിപണി തന്ത്രങ്ങള്‍ ആവിഷ്‌ക്കരിക്കുക. ആദ്യം അഞ്ച് ഡോളറിന്റെ ചെറിയ ഓഹരികള്‍ വച്ച് കളിച്ച ആദി ക്രമേണ കൂടുതല്‍ വിലയേറിയ ഓഹരികള്‍ വാങ്ങാനും വില്‍ക്കാനും തുടങ്ങി. ആമസോണ്‍, ഗൂഗ്ള്‍, ആപ്പിള്‍, ടെസ്ല, മൈക്രോസോഫ്റ്റ്, ഫെയ്‌സ്ബുക്ക്, ബോയിംഗ് തുടങ്ങി 40ലേറെ കമ്പനികളില്‍ നിലവില്‍ ആദിക്ക് ഓഹരികളുണ്ട്.
പ്രധാന ഹോബി റോബോട്ടിക്‌സ്
ഓഹരി നിക്ഷേപത്തിലൂടെ തനിക്ക് കൈവന്ന പണം തന്റെ റോബോട്ടിക്‌സ് പ്രൊജക്ടിനായി ചെലവഴിക്കാനാണ് ഈ 14കാരന്റെ പ്ലാന്‍. അതോടൊപ്പം ആവശ്യക്കാരായ ഏതാനും കുട്ടികളെ സഹായിക്കുകയും വേണം. റോബോട്ടിക്‌സിലെ പ്രായോഗിക അറിവ് കാരണം പല സ്ഥാപനങ്ങളും ക്ലാസ്സെടുക്കാന്‍ ആദിയെ ക്ഷണിക്കാറുണ്ട്. സാമൂഹിക സേവനമായി കണ്ട് സൗജന്യമായി ക്ലാസ്സെടുത്ത് നല്‍കുന്നതാണ് ആദിയുടെ രീതി. റോബോട്ടുകള്‍ മനുഷ്യര്‍ക്ക് ഭീഷണിയാണെന്ന വാദം ശരിയല്ലെന്ന പക്ഷക്കാരനാണ് ഈ പത്താം ക്ലാസ്സുകാരന്‍. മറിച്ച് അവ കൂടുതല്‍ അവസരങ്ങള്‍ തുറന്നിടുകയാണ് ചെയ്യുന്നതെന്ന് ഈ കൊച്ചുമിടുക്കന്‍ പറയുന്നു.
