നൂറ് വർഷം പഴക്കമുള്ള കരുവന്നൂർ ബാങ്ക്; സമാനതകളില്ലാത്ത തട്ടിപ്പ്

മലബാർ കലാപം നടന്ന 1921ലാണ് കരുവന്നൂർ ബാങ്കിന്റെ തുടക്കം. പ്രദേശത്തെ കോൾപടവ് കർഷകരായിരുന്നു ബാങ്കിന് തുടക്കം കുറിച്ചത്. ബാങ്ക് സ്ഥാപിക്കപ്പെട്ടതിന്റെ നൂറാം വർഷമാണ് തട്ടിപ്പ് വെളിച്ചത്താകുന്നത്. മികച്ച പ്രവർത്തന പാരമ്പര്യമുള്ള ബാങ്കിന് നിക്ഷേപകരെ നിഷ്പ്രയാസം കണ്ടെത്താനായി. അഞ്ച് ശാഖകളും ഒരു എക്സ്റ്റൻഷൻ സെന്ററും മൂന്ന് സൂപ്പർമാർക്കറ്റുകളും മൂന്ന് നീതി സ്റ്റോറുകളും പേപ്പർ ബാഗ് യൂണിറ്റും ജനസേവാ കേന്ദ്രവും റബ്കോ വളം ഏജൻസിയും ബാങ്കിനു കീഴിൽ പ്രവർത്തിക്കുന്നുണ്ട്. കഴിഞ്ഞ 40 വർഷമായി സിപിഎം ഭരണ സമിതിക്കു കീഴിലാണ് കരുവന്നൂർ ബാങ്ക് പ്രവർത്തിക്കുന്നത്. നൂറ് വർഷത്തിനിടെ 150 ജീവനക്കാരുള്ള സ്ഥാപനമായി കരുവന്നൂർ ബാങ്ക് വളർന്നു.

മികച്ച നിക്ഷേപം ഉണ്ടായിട്ടും വിദഗ്ദ ചികിത്സ ലഭിക്കാതെ നിക്ഷേപകയായ ഫിലോമിന (70) മരിച്ചതിനു പിന്നാലെയാണ് കരുവന്നൂർ ബാങ്ക് തട്ടിപ്പ് വീണ്ടും ചർച്ചയിൽ നിറയുന്നത്. ഫിലോമിനയുടെ പേരിൽ കരുവന്നൂർ ബാങ്കിൽ 30 ലക്ഷം രൂപയുടെ നിക്ഷേപം ഉണ്ടായിരുന്നു. പണം തിരികെ കിട്ടിയിരുന്നെങ്കിൽ ചികിത്സ നടത്താമായിരുന്നുവെന്ന് ബന്ധുക്കൾ പറയുന്നു. നിക്ഷേപം തിരികെ ചോദിച്ചപ്പോൾ കിട്ടുമ്പോൾ തരാം എന്നുള്ള ധാർഷ്ട്യം നിറഞ്ഞ മറുപടിയാണ് ബാങ്ക് അധികൃതരിൽ നിന്നും ലഭിച്ചതെന്ന് ബന്ധുക്കൾ വ്യക്തമാക്കി.

2010 മുതലാണ് കരുവന്നൂർ ബാങ്കിൽ തട്ടിപ്പിന്റെ പരമ്പര ആരംഭിക്കുന്നത്. കേസിൽ സിപിഎം പ്രവർത്തകരാണ് മുഖ്യ പ്രതികൾ എന്നത് ശ്രദ്ധേയമാണ്. പ്രതിയായ ബാങ്ക് മുൻ സെക്രട്ടറി ടി ആർ സുനിൽ കുമാർ, മുൻ ബ്രാഞ്ച് മാനേജർ കെ എം ബിജു കരിം, ചീഫ് അക്കൗണ്ടന്റ് സി കെ ജിൽസ് എന്നിവർ പാർട്ടി അംഗങ്ങളായിരുന്നു. സിപിഎം പ്രവ‍ർത്തകരുടെ നീണ്ട നിരയാണ് തട്ടിപ്പിനു പിന്നിലുള്ളത്.

46 പേരുടെ ആധാരത്തിലെടുത്ത വായ്പ 22.85 കോടി രൂപ ബാങ്ക് കമ്മീഷൻ ഏജന്റായി നിയമിച്ച കിരണിന്റെ അക്കൗണ്ടിലാണ് എത്തിയത്. ഭരണ സമിതി അംഗങ്ങളും ജീവനക്കാരും ചേ‍ർന്നു നടത്തിയ തട്ടിപ്പിൽ ഒന്നുമാത്രമാണിത്. പന്ത്രണ്ട് വ‍ർഷത്തിനിടെ മുന്നൂറ് കോടിയോളം രൂപയുടെ ക്രമക്കേടാണ് ബാങ്കിൽ നടന്നത്. ബാങ്കിലെ മുൻ ജീവനക്കാരും ഭരണ സമിതി അംഗങ്ങളും ഉൾപ്പെടെ 18 പേ‍ർ പിടിയിലായെങ്കിലും അഞ്ച് പേ‍ർ ഒഴികെ മറ്റെല്ലാവർക്കും ജാമ്യം ലഭിച്ചു. തട്ടിപ്പിന് കൂട്ടുനിന്ന സഹകരണ വകുപ്പിലെ 16 ജീവനക്കാരെ സസ്പെന്റ് ചെയ്തെങ്കിലും പിന്നീട് തിരിച്ചെടുത്തു.

2015-16 വ‍ർഷം ബാങ്കിൽ ഉണ്ടായിരുന്നത് 501 കോടിയുടെ നിക്ഷേപം. 2016-17 വർഷം ഇത് 424 കോടിയായി കുറഞ്ഞു. 2017-18ൽ ഇത് 405 കോടിയായും 2018-19 വ‍ർഷം 301 കോടിയായും കൂപ്പുകുത്തി. 2021 ജൂലൈ മാസമാണ് തട്ടിപ്പിന്റെ കാണാപ്പുറം പുറം ലോകം അറിയുന്നത്. വിവിധ കാലയളവുകളിലായി നൂറ് കോടി രൂപയുടെ തിരിമറി നടന്നുവെന്ന പരാതിയെത്തുടർന്ന് കരുവന്നൂ‍ർ സഹകരണ ബാങ്കിലെ മുൻ സെക്രട്ടറിയടക്കം ആറ് പേർക്കെതിരെ ഇരിങ്ങാലക്കുട പോലീസ് കേസെടുത്തതോടെയാണ് സംഭവം വിവാദമായത്. ബാങ്കിലെ നിലവിലെ സെക്രട്ടറി ശ്രീകലയുടെ പരാതിയിലാണ് അറസ്റ്റ് നടന്നത്. ഭൂമിയുടെ മതിപ്പു വിലയേക്കാൾ വായ്പ അനുവദിക്കൽ, ബാങ്കിന് കീഴിലുള്ള സൂപ്പ‍ർമാർക്കറ്റിലേക്ക് സാധനങ്ങൾ വാങ്ങിയ തുകയിലെ ക്രമക്കേട് അടക്കം ചൂണ്ടിക്കാട്ടിയാണ് പരാതി നൽകിയത്.

അന്വേഷണം പുരോഗമിക്കുന്നതിനിടെ ഭരണസമിതിയെ പിരിച്ചുവിട്ട് ബാങ്കിൽ അഡ്മിനിസ്ട്രേറ്റ‍ർ ഭരണം ഏ‍ർപ്പെടുത്തി. നൂറ് കോടിയുടെ തട്ടിപ്പ് ബാങ്കിൽ നടന്നുവെന്നാണ് ജോയിന്റ് രജിസ്ട്രാ‍ർ കണ്ടെത്തിയത്. വായ്പ നൽകിയ വസ്തുക്കളുടെമേൽ വീണ്ടും വായ്പ നൽകിയും ക്രമം തെറ്റിച്ച് പല അക്കൗണ്ടുകളിലേക്ക് പണം മാറ്റിയുമായിരുന്നു തട്ടിപ്പ്. സഹകരണ വകുപ്പിന്റെ വകുപ്പുതല അന്വേഷണത്തിൽ 226.77 കോടിയുടെ തട്ടിപ്പാണ് കണ്ടെത്തിയത്.

ഏറെ സങ്കീ‍ർണതയുള്ള കേസായതിനാൽ ക്രൈം ബ്രാഞ്ച് കുറ്റപത്രം ഇനിയും സമ‍ർപ്പിച്ചിട്ടില്ല. ബാങ്കിലെ ക്രമക്കേടിനെക്കുറിച്ച് അന്വേഷിക്കാൻ സർക്കാർ ഒമ്പതംഗ സമതിയെ നിയോഗിച്ചിരുന്നു. കഴിഞ്ഞ ജൂലൈ 29ന് ആരംഭിച്ച അന്വേഷണത്തിന്റെ റിപ്പോ‍ർട്ട് സർക്കാരിന് സമർപ്പിച്ചിരുന്നു.