തമിഴ് നടൻ ശരത്കുമാറിന് കൊവിഡ് സ്ഥിരീകരിച്ചു

നടൻ ശരത്കുമാർ കൊവിഡ് സ്ഥിരീകരിച്ചു. ഭാര്യ രാധിക ശരത്കുമാർ ആണ് ഈ വിവരം സ്ഥിരീകരിച്ചത്. രാധിക ഇത് സംബന്ധിച്ച് ട്വീറ്റ് പങ്കുവെച്ചിട്ടുമുണ്ട്. ലക്ഷണങ്ങൾ ഒന്നും ഉണ്ടായിരുന്നില്ലെന്നും അദ്ദേഹമിപ്പോള്‍ ഡോക്ടമാരുടെ നിരീക്ഷണത്തിലാണെന്നും രാധിക ട്വീറ്റിൽ വ്യക്തമാക്കിയിട്ടുണ്ട്.

ഹൈദരാബാദിൽ വെച്ച് ശരത്കുമാറിന് കൊവിഡ് സ്ഥിരീകരിച്ചു. ലക്ഷണങ്ങളൊന്നും ഉണ്ടായിരുന്നില്ല. ഏറ്റവും മികച്ച ഡോക്ടമാരുടെ കരങ്ങളിൽ അദ്ദേഹം സുരക്ഷിതനാണ്. അദ്ദേഹത്തിന്‍റെ ആരോഗ്യത്തെ കുറിച്ച് വരും ദിവസങ്ങളിൽ അപ്ഡേറ്റുകള്‍ നൽകാം, രാധിക ട്വീറ്റ് ചെയ്തിരിക്കുന്നത് ഇങ്ങനെയാണ്.

അദ്ദേഹം രോഗമുക്തിയിലേക്കുള്ള പാതയിലാണെന്ന് മകളും നടിയുമായ വരലക്ഷ്മിയും ട്വീറ്റ് ചെയ്തിട്ടുണ്ട്. തമിഴ് സിനിമയിലെ പഴയകാല നടന്മാരിൽ ബലവത്തായ ശരീര സൗന്ദര്യം കാത്തു സൂക്ഷിക്കുന്നയാളാണ് ശരത് കുമാര്‍. 66-ാം വയസ്സിലും അദ്ദേഹം തന്‍റെ വ്യായാമം മുടക്കാറില്ല. സോഷ്യൽമീഡിയയിൽ വര്‍ക്കൗട്ട് ചിത്രങ്ങൾ അദ്ദേഹം പങ്കുവയ്ക്കാറുമുണ്ട്.

കുറച്ച് ദിവസങ്ങൾക്ക് മുമ്പ് പുലർച്ചെ 5.30ന് ജിമ്മിൽ വ്യായാമത്തിനെത്തിയതും അവിടെ വെച്ച് ബോളിവുഡ് താരം സോനു സൂദിനെ കണ്ടതും ശരത്കുമാര്‍ ട്വിറ്ററിൽ പങ്കുവെച്ചിരുന്നു. സോനുവിന്‍റെ കൊവിഡ് കാലത്തെ ജീവകാരുണ്യ പ്രവര്‍ത്തനങ്ങളെ അദ്ദേഹം പുകഴ്ത്തുകയും ചെയ്തിരുന്നു.