മലയാളത്തിന്‍റെ സൂപ്പര്‍ താരം സുരേഷ് ഗോപിയുടെ എക്കാലത്തേയും മികച്ച ആക്ഷൻ ചിത്രമായ ‘ലേലം’ ഇന്നും സിനിമാ പ്രേമികൾക്ക് പ്രിയപ്പെട്ട ചിത്രമാണ്. 1997ൽ പുറത്തിറങ്ങിയ മാസ് ആൻഡ് ക്ലാസ് പടത്തിലെ കഥാപാത്രങ്ങളും ഡയലോഗുകളും വരെ ഇന്നും പലരും ഓര്‍ത്തിരിക്കുന്നവയാണ്. സിനിമയുടെ രണ്ടാം ഭാഗം വെളളിത്തിരയിൽ എത്തുമെന്ന വാര്‍ത്തകള്‍ വന്നു തുടങ്ങിയിട്ട് ഏറെ നാളായി. രൺജി പണിക്കര്‍ തിരക്കഥയെഴുതിയ ലേലം സംവിധാനം ചെയ്‌തത് ജോഷിയായിരുന്നു. ഇപ്പോഴിതാ ചിത്രത്തിന്‍റെ രണ്ടാം ഭാഗത്തിന് മുമ്പേ ഒരു ലേലം റഫറൻസ് പരസ്യം എത്തിയിരിക്കുകയാണ്.
‘മറിയം വന്ന് വിളക്കൂതി’ എന്ന സിനിമയുടെ സംവിധായകനായ ജെനിത് കാച്ചപ്പിള്ളി ഒരുക്കിയ പരസ്യ ചിത്രത്തിലാണ് ലേലം റഫറൻസ്. അനുവാദം തന്ന രഞ്ജി സാറിനും, എന്നെ ഇതിലേക്ക് എത്തിച്ച അജു ചേട്ടനും, ആഗ്രഹിക്കുന്ന ഫ്രീഡം തന്ന സ്വാതിക്കിനും, ആവേശത്തോടെ കൂടെ നിന്ന ഗോകുലിനും നന്ദി. പിന്നെ സുരേഷ് ഗോപി സാറിനും. അവിടെ ചെന്ന് മുന്നിലിരുന്ന് കഥ പറഞ്ഞ ഫീൽ മറക്കില്ല. എന്നത്തേയും പോലെ ടീമിന് ഉമ്മകൾ എന്ന് കുറിച്ചുകൊണ്ടാണ് ജെനിത് പരസ്യം സോഷ്യൽമീഡിയയിൽ പങ്കുവെച്ചിരിക്കുന്നത്.
പരസ്യത്തിൽ സുരേഷ് ഗോപി അവതരിപ്പിച്ച കഥാപാത്രം സാക്ഷാൽ ആനക്കാട്ടിൽ ചാക്കോച്ചിയുടെ മകൻ ചാക്കോച്ചി ജൂനിയറായാണ് ഗോകുൽ സുരേഷ് അഭിനയിക്കുന്നത്. എൻ.എഫ് വര്‍ഗ്ഗീസ് അവതരിപ്പിച്ച കടയാടി രാഘവന്‍റെ മകനായ കടയാടി ജൂനിയറായാണ് അജു വര്‍ഗ്ഗീസ് എത്തുന്നത്. കാലം മാറി ലേലം മാറി എന്ന പരസ്യവാചകവുമായുള്ളതാണ് പരസ്യം. ലേലവും വാശിയും ഇന്നും ഇവരെ വിട്ട് പോയിട്ടില്ല. ഇപ്പോൾ ഇവരുടെ ലേലം ഡിജിറ്റലാണ്. കേരളത്തിലെ ആദ്യത്തെ ബിഡ്ഡിങ് ആപ്പായ സേവ് ബോക്സിന്‍റേതാണ് പരസ്യ ചിത്രം.
