നടൻ പൃഥ്വിരാജ് സുകുമാരൻ സംവിധാനം ചെയ്ത ‘ലൂസിഫറി’ന് ശേഷം വീണ്ടും മാസ് വേഷവുമായി മോഹൻലാൽ. നെയ്യാറ്റിൻകര ഗോപൻ എന്ന കഥാപാത്രമായി മോഹൻലാൽ എത്തുന്ന ചിത്രമായ ‘ആറാട്ട്’ ഫസ്റ്റ് ലുക്ക് പോസ്റ്റര്‍ പുറത്തിറങ്ങി. കോമഡിയും ആക്ഷനും സമം ചേർത്തുള്ള മാസ്സ് മസാല എന്‍റര്‍ടെയ്നര്‍ സംവിധാനം ചെയ്യുന്നത് സംവിധായകനും നിര്‍മ്മാതാവുമായ ബി ഉണ്ണികൃഷ്ണനാണ്. 2255 നമ്പറുള്ള കറുത്ത വിന്‍റേജ് ബെൻസ് കാറിൽ വന്നിറങ്ങുന്ന മോഹൻലാലിന്‍റെ കൈയും വിൻഡോയിൽ പ്രതിഫലിക്കുന്ന മുഖവുമാണ് പോസ്റ്ററിലുള്ളത്.
‘നെയ്യാറ്റിന്‍കര ഗോപന്‍റെ ആറാട്ട്’ എന്നാണ് സിനിമയ്ക്ക് മുഴുവന്‍ പേര്. ‘വില്ലൻ’ എന്ന സിനിമയ്ക്ക് ശേഷം ബി ഉണ്ണികൃഷ്ണനും മോഹന്‍ലാലും ഒരുമിക്കുന്ന സിനിമയാണിതെന്ന പ്രത്യേകതയുമുണ്ട്. തീയേറ്ററുകളിൽ സമ്മിശ്ര പ്രതികരണം നേടിയ വില്ലൻ ഓൺലൈൻ റിലീസിന് ശേഷം സോഷ്യൽമീഡിയയിൽ ഏറെ ചര്‍ച്ചയായിരുന്നതാണ്.
നെയ്യാറ്റിന്‍കരയില്‍ നിന്നും ഒരു പ്രത്യേക കാര്യം നിര്‍വ്വഹിക്കാനായി പാലക്കാട്ടെ ഒരു ഗ്രാമത്തില്‍ ഗോപൻ എത്തുന്നതിനെ തുടര്‍ന്നുള്ള സംഭവ വികാസങ്ങളാണ് ആറാട്ടിന്‍റെ പ്രമേയം. ‘പുലിമുരുകന്’ ശേഷം ഉദയകൃഷ്ണ മോഹന്‍ലാലിനുവേണ്ടി തിരക്കഥയൊരുക്കുന്ന സിനിമ കൂടിയാണ് ‘ആറാട്ട്. ശ്രദ്ധ ശ്രീനാഥ്, നേഹ സക്സേന എന്നിവരാണ് നായികമാര്‍. നെടുമുടി വേണു, സായ് കുമാര്‍, സിദ്ദിഖ്, വിജയരാഘവന്‍, മാളവിക, രചന നാരായണന്‍കുട്ടി, ജോണി ആന്‍റണി, ഇന്ദ്രന്‍സ്, നന്ദു, ഷീല, സ്വാസിക തുടങ്ങി നിരവധി താരങ്ങള്‍ സിനിമയിലുണ്ട്.
പോസ്റ്ററിൽ മോഹൻലാലിനെ മുഖം വ്യക്തമാക്കാത്തത്തിലുള്ള നിരാശ ചില ആരാധകര്‍ കമ‍ന്‍റിൽ പ്രകടിപ്പിച്ചിട്ടുണ്ട്. മുഖമെന്തിന് ആ കൈ തന്നെ ധാരാളം എന്നാണ് വേറെ ചില ആരാധകരുടെ കമന്‍റ്. ദൃശ്യം 2, റാം, മരക്കാര്‍ അറബിക്കടലിന്‍റെ സിംഹം തുടങ്ങി നിരവധി സിനിമകളാണ് ലാലിന്‍റേതായി ഇനി പുറത്തിറങ്ങാനിരിക്കുന്നത്.
